Шилдэг түрүүч, байлдагчийн шинэ жил боллоо

Монгол Улсын Үндсэн хуулиар хүлээсэн үндсэн үүргээ үнэнчээр биелүүлж, эх орноо батлан хамгаалах эрхэм үйлсэд шамдан суралцаж, үеийн нөхдөө манлайлан албаа хаасан цэргийн гэрээт болон хугацаат цэргийн алба хаагчдын “Шилдэг дайчдын шинэ жил”-ийн арга хэмжээг өнөөдөр амжилттай зохион байгууллаа.

“Шилдэг дайчдын шинэ жил”-ийн арга хэмжээнд Монгол Улсын Их Хурал, Засгийн газрын гишүүн, Батлан хамгаалахын сайд С.Бямбацогт, ЗХЖШ-ын дарга хошууч генерал С.Ганбямба тэргүүтэй удирдлагууд оролцож, шилдгээр шалгарсан байлдагч, түрүүч, гэрээт цэргийн алба хаагчдад хүндэтгэл үзүүлэв.

Мөн энэхүү арга хэмжээнд сурлага, сахилга, ажил хөдөлмөр, амжилт бүтээл, авьяас билгээрээ шалгарсан цэргийн гэрээт болон хугацаат цэргийн алба хаагчид оролцсон бөгөөд тэдэнд хандаж Батлан хамгаалахын сайд С.Бямбацогт хэлсэн үгэндээ "Эх орныхоо өмнө хүлээсэн үүргээ амжилттай биелүүлж, цэргийн эрдэмд шамдан суралцаж буй тэргүүний залуусаа хараад маш их бахархаж байна. "Батлан хамгаалахын сэргэлт" бодлогын хүрээнд хугацаат цэргийн алба хаагчид Та бүхэн цэргийн эрдэм, сургалт бэлтгэлээс гадна англи хэл, компьютерын мэдлэгтэй болж халагдана. Эх орноо батлан хамгаалах зорилгод нь, цаашдын ажил амьдралд нь зайлшгүй чухал шаардлагатай учраас сургалтад хамрагдаж жолооны үнэмлэхтэй болно.

Албаа нэр төртэйгөөр хааж шилдэг нь гэдэг алдраа цэрэгт байх хугацаандаа хадгалахыг эрхэм дүү нартаа захья" гэсэн юм.

Шилдэг дайчдын шинэ жилийн баярт урлагийн тоглолтоос гадна эх үрс, найз нөхдийг уулзуулах баярт үйл явдал тохиолдож, баяр дээр баяр нэмлээ.