н.Батболд: Зургаан сар зээлийг нь төлж хүлээсэн машинаа унах эрхгүй болчихлоо

Импортоор орж ирж буй машинд Улаанбаатарын серитэй улсын дугаар олгохгүй байгаа асуудлаар иргэд Үндсэн хуулийн цэцэд хандлаа. Нийслэлийн хэмжээнд энэхүү зохицуулалт энэ сарын 8-наас хэрэгжиж эхэлсэн. Тэгвэл тус шийдвэр нь багагүй чирэгдэл учруулж, цаашлаад хүний эрхэнд халдаж байна гэж иргэд ярьж байна.  

 

БГД-ийн 30-р хорооны иргэн н.Батболд:

"Миний хувьд өнгөрсөн дөрөвдүгээр сард банкны зээлээр машин захиалсан. Гэтэл 6-7 сар хүлээгдэж байж сая л Тяньжинаас хөдөлж байна гэнэ. Энэ хугацаанд банкныхаа зээлийг төлсөөр л байсан. Ингээд машин маань ирэхээр би машинаа авч болохгүй нөхцөл үүсэж байна. Дугаар авч болохгүй, начир дээрээ гааль дээрээс ч авч болохгүй юм шиг байгаа юм. Дугаар зүүхгүй бол миний өмч биш болчихно шүү дээ. Нийслэл хотод олгох улсын бүртгэлийн дугаарын дээд хязгаарыг нийслэлийн засаг даргын саналыг үндэслэн тогтооно гэж заасан байна лээ.

Яагаад иргэд өөрсдийнхөө төлөөлөгчдийг сонгочхоод байтал Хотын дарга Х.Нямбаатар шийдэх ёстой гэж. Хүн амынх нь тал хувь нь амьдарч байхад яагаад бидний хувийн өмчтэй байх эрхийг хорино гэж. Мөн яагаад дээд хязгаар 735 мянга байсан хэр нь 785 мянга болж нэмэгдсэн юм.

Мөн шалгуур үзүүлэлтээр дугаар олгохоор болсон. Евро4 хөдөлгүүрээс дээш машинд дугаар олгоно гэж байгаа юм. Тэр нь 2023 оны 0 км-тэй Прадо гэж машин хүртэл тэнцэхгүй байгаа юм. Ингээд харахаар ерөөсөө хятад машин л ихээр оруулах гэсэн санаа гэж харж байна. Бас тэр граштай, зогсоолтой байх гэж байгаа юм. Грашаас гардаггүй юм бол машин байтугай дугаар ч авах хэрэггүй. Энэ мэтчилэн маш олон асуудал үүсгэж, огт амьдралд нийцэхгүй шийдвэр гаргаснаа эргэж хараасай гэсэндээ бид хуулийн байгууллагад хандаж байна.