Волейболын дээд лигийн хагас шигшээ тоглолт энэ сарын 11-нээс эхэлнэ

Волейболын Үндэсний дээд лигийн гуравдугаар тойргийн тоглолтууд үргэлжилж буй. Эл тойргийн сүүлийн тоглолтууд энэ сарын 9-нд болж өндөрлөхөөр байна. Тойргийн тоглолтууд ийн дуусах дөхсөнөөр хагас шигшээд өрсөлдөх багуудын нэрс тодорхой боллоо. 

Эмэгтэй багуудаас, "Улаанбаатар финикс", "Ховд ижил алтай торгууд", "Уурхайчин", "Хөвсгөл эрчим" гэсэн дөрвөн баг хагас шигшээд шалгараад байна. 

Эрэгтэй багуудаас, "SG Hawks", "Хасумегастарс", "Төв миг", "Натур бакс" багууд шалгарч үлдлээ. Гуравдугаар тойргийн сүүлийн тоглолтуудаас аль баг нь хэдээр гарах нь тодорхой болно. Улмаар багууд хагас шигшээд өрсөлдөж, түрүүлж хоёр хожсон нь аваргын төлөө тоглох эрхтэй болох юм. Харин хожигдсон багууд хүрэл медалийн төлөө өрсөлдөнө. 

Хагас шигшээ тоглолтууд нэгдүгээр сарын 11, 12, 14, 16, 18, 19-ний өдрүүдэд болох хуваарь гарчээ. 

Сануулахад, өнгөрсөн жил эмэгтэй багуудаас “Хөвсгөл Эрчим” аваргын алтан медаль хүртсэн бол, “Хилчин” мөнгөн медаль, “Тэнүүн огоо” хүрэл медалийн эзэд болсон. 

Харин эрэгтэй багуудаас “Натур Мед Толун” алтан медаль, “Шанх Транс” мөнгөн медаль, “Хасумегастарс” хүрэл медаль хүртсэн билээ.