Р.Саруул: Ерөнхий сайд иргэнийхээ эрхэнд халдсан, хуулийн байгууллагад хандаж нэр төрөө сэргээлгэнэ

Ерөнхий сайд Л.Оюун-Эрдэнэ нэгдүгээр сарын 07-ны өдөр хэвлэлд өгсөн ярилцлагадаа "жагсаал цуглааныг санхүүжүүлж байгаа хүмүүс нь Р.Чингис болон түүний дүү Р.Саруул нар юм" хэмээн шулуухан мэдэгдсэн. Үүний дараагаар Р.Чингисийг үүрэгт ажлаас нь чөлөөлсөн байдаг. Тэгвэл Дотоодын цэргийн штабын дарга Р.Чингисийн дүү Р.Саруул өөрийн цахим хуудастаа худал мэдээлэл гэдгийг нийтэлж, нэр төрөө сэргээлгэнэ гэжээ.

Тэрбээр, 

 "...Дотоодын цэргийн командлагч (угтаа бол штабын дарга) Чингис болон түүний дүү Саруул энэ жагсаалтай холбоотой асуудлыг санхүүжүүлж байгаа..." гэж илтэд худал мэдээллээр нийтэд сөрөг ойлголт төрүүлэн төр, ард түмний эсрэг үйлдэл хийсэн мэтээр ойлгуулж миний ахын болон миний нэр төр, алдар хүндэд халдсан үйлдэл гаргалаа. Манай гэр бүл үе удам дамжин хууль сахиулах байгууллагын тусгай мэргэжил эзэмшиж, тангараг өргөн алба хааж байсны хувьд Эх орон, төр, ард түмнийхээ эсрэг гадаад, дотоодоос санхүүжилт авч жагсаал цуглаан санхүүжүүлэх нь бүү хэл тийм өчүүхэн нэгэн бодол ч тээхгүй гэдгийг хариуцлагатайгаар хэлье! 

Монгол Улсын Үндсэн хууль болон бусад хуулийн биелэлтийг хангах бүрэн эрх, чиг үүргийг хуулиар хүлээсэн Засгийн газрыг удирддаг Ерөнхий сайдын энэхүү дэндүү хариуцлагагүй худал мэдэгдэл нь ИРГЭДИЙНХЭЭ ҮНДСЭН ХУУЛИАР ХАМГААЛАГДСАН НЭР ТӨР, АЛДАР ХҮНДЭД ХАЛДАЖ БУЙ ОВИЛГОГҮЙ ҮЙЛДЭЛ агаад үүнтэй холбоотой асуудлаар хууль-шүүхийн байгууллагад хандаж нэр төрөө цэвэрлэн сэргээлгэхийг үүгээр мэдэгдье!   Монгол Улсын иргэн Р.САРУУЛ" гэжээ.