Г.Пүрэвдэлгэр: Жагсагчид замын хөдөлгөөнд саад учруулсан асуудлыг шалгаж байна

Өнгөрсөн амралтын өдрүүдэд эхэлсэн жагсаалын үед гарсан зөрчлүүдэд ямар арга хэмжээ авсан талаар ЦЕГ-ын Хэвлэл мэдээллийн төвийн дарга, Дэд хурандаа Г.Пүрэвдэлгэр мэдээлэл өглөө.

Тэрбээр "Энэ оны нэгдүгээр сарын 7-ны өдөр Эрх чөлөөний эвсэл намаас Сүхбаатар дүүргийн засаг даргад жагсаал цуглаан зохион байгуулах талаар албан бичиг хүргүүлсэн. Үүний хариуд энэ сарын 9-ний өдөр Сүхбаатар дүүргийн засаг даргыг түр орлон гүйцэтгэгч Өнөрцэцэг уг жагсаал цуглааныг бүртгэж авсан талаар хариу хүргүүлсэн байна. 

Улмаар өнгөрөгч амралтын өдрүүдэд буюу нэгдүгээр сарын 11, 12-нд Монгол Улсын иргэд үзэл бодлоо илэрхийлэх эрхийнхээ дагуу жагссан. Энэ үеэр цагдаагийн байгууллагад нийт 13 гэмт хэрэг, зөрчлийн шинжтэй мэдээлэл бүртгэгдсэн. 

Үүнээс гэмт хэргийн шинжтэй 7, зөрчил 6 хэрэг бүртгэгдсэн байна. Иргэдийн эд хөрөнгийг эвдэж сүйдэлсэн, төрийн онцгой объект руу бие засах, нэвтрэх хориотой газар руу нэвтрэх гэж оролдох, цагдаагийн албан хаагчийн биед халдах, төрийн байгууллагын ажилтны савхан ясыг хугалсан, цагдааг шатнаас түлхэж унагаан гэмтээсэн зэрэг гэмт хэргийн шинжтэй хэргүүд гарсан ба холбогдогчийг шалгаж байна. Бага насны хүүхэдтэй эмэгтэйн тээврийн хэрэгслийг нь хаахад нь шаардлага тавихад түлхэж унагаасан зэрэг хэргүүдийг бүртгэж, зөрчлийн хэрэг нээн ажиллаж байна.

Бага насны хүүхэдтэй, архи согтууруулах ундаа хэрэглэсэн, насанд хүрээгүй хүүхэд, ахмад настан, хөгжлийн бэрхшээлтэй зэрэг нийт 129 иргэнд холбогдох хууль журмын хүрээнд зөвлөгөө өгч, ар гэрт нь аюулгүй хүргэж өгсөн.

Жагсагчид зам хаасны улмаас замын хөдөлгөөнд түгжрэл үүсэж, иргэдийн зорчих эрхийг зөрчсөн. Тэнд хүнд өвчтэй, ахмад настан, хүүхэд нь өвдсөн гэх мэт иргэд, яаралтай түргэн тусламжийн машин ч зорчиж байсан. Үүнд мөрдөн шалгах, зөрчлийн хэрэг бүртгэх ажиллагаа явуулж байна. 

Жагсагчдад эрх чөлөөг нь хангах үүднээс цагдаагийн байгууллагаас маш хүндэтгэлтэй хандсан. 

Тэгэхээр зам хааж жагсах нь хууль бус тул бусдын эрхийг хүндэтгэж үзэхийг хүсье. Учир нь эвлэлдэн нэгдэж тайван жагсах нь бусдын эрхийг зөрчих ёсгүй хэмээн хуульдаа заасан байдаг"  хэмээв.