Юн Сок Ёль өөрийнх нь эсрэг мөрдөн шалгалтыг хууль бус гэж үзсэн хэвээр байна

Өмнөд солонгосын бүрэн эрхээс нь түдгэлзүүлсэн ерөнхийлөгч Юн Сок Ёль өөрийнх нь эсрэг мөрдөн шалгалтыг хууль бус гэж үзсэн хэвээр. Энэ ч үүднээсээ цаашдын мөрдөн шалгалт байцаалтад мэдүүлэг өгөхгүй гэдгээ нэгдүгээр сарын 16-нд өмгөөлөгчөөрөө дамжуулж мэдэгджээ. Лхагва гарагт саатуулагдсан Ерөнхийлөгчийн хувьд өнгөрсөн 12 сарын эхээр цэргийн онц байдал зарлаж бослого үймээн өдүүлсэн хэргээр шалгагдаж байгаа. Өнөөдөр мөн Ерөнхийлөгчийн бүрэн эрхийг түдгэлзүүлсэн парламентын шийдвэрийн асуудлаарх ҮХШ-ийн 2 дахь сонсгол явагдсан байна.

Мөрдөн шалгагчид түүнээс өнөө өглөөнөөс эхлэн мэдүүлэг авах байсан ч Юн Сок Ёль эрүүл мэндийн шалтгаанаар хойшлуулах хүсэлт гаргаснаар байцаалтыг өдрийн 14 цагт болж хойшлуулсан ч мөн оролцоогүй байна. Юн Сок Ёлийн өмгөөлөгчийн зүгээс ерөнхийлөгч өчигдөр 10 цаг үргэлжилсэн байцаалтын явцад байр сууриа бүрэн дүүрэн тайлбарласан учраас нэмж мэдүүлэх зүйлгүй гэдэг байр суурь илэрхийлжээ. Түүнээс гадна Юн Сок Ёлийг баривчилсан захирамжийн эрх зүйн үндэслэлийг нягтлуулах хүсэлтийг өмгөөлөгчдийнх нь зүгээс шүүхэд гаргасан.

Мөн Юн Сог Ёлийг баривчлан саатуулах 48 цагийн хугацаатай, баасан гарагийн өглөө хүртэл хүчинтэй, наана нь мөрдөгчид хугацааг сунгах хүсэлт гаргах мэдээлэлтэй байна. Лхагва гарагт өөрийн өргөөнөөс саатуулагдах үедээ Юн Сок Ёль өндөр албан тушаалтнуудын авлигатай тэмцэх газар өөрийг нь мөрдөн шалгах эрхгүй, хүч хэрэглэх явдал гарахаас зайлсхийх үүднээс гагцхүү мөрдөгчдийн шаардлагыг дагасан гэдгээ мэдэгдэж байсан. Улмаар тэр албан үүргээсээ чөлөөлөгдөөгүй байхдаа хууль шүүхийн байгууллагад саатуулагдсан Өмнөд Солонгосын түүхэнд анхны ерөнхийлөгч болсон.

Үүнээс гадна цэргийн онц байдал зарласнаас нь үүдэж Ерөнхийлөгчийн бүрэн эрхийг түдгэлзүүлсэн парламентын шийдвэрийг албажуулах эсвэл буцаах асуудлыг шийдэх үйл явц Үндсэн хуулийн шүүхэд эхэлсэн. Өнөөдөр хоёр дахь албан сонсгол нь болж, шүүгчид гэрчүүд болон нотлох баримтуудыг баталсан, Ерөнхийлөгч Юны өмгөөлөгчдийн зүгээс тэр бүгдийг хууль бус гэж мэдүүлснийг хүлээж аваагүй байна. Үндсэн хуулийн шүүхийн дараа дараагийн сонсгол энэ сарын 21,23-д болон ирэх 2 сарын туршид товлогдсон. Өмнөд Солонгосын Үндсэн хуулийн шүүх нийт 9 орон тоотойгоос бүрэн эрхийн хугацаа нь дууссан 3 шүүгчийн орны 2 шүүгч энэ сард томилогдсон. Ерөнхийлөгч Юны бүрэн эрхийг түдгэлзүүлсэн шийдвэрийг энэ шүүхийн дор хаяж 6 шүүгчийн шийдвэрээр эцэслэх ёстой байна.