Менингококкоор өвдсөн хүүхдийн биеийн байдал маш хүнд байна

Өчигдөр /2025.01.30/ Налайх дүүрэгт менингококкт халдварын нэг тохиолдол илэрч, "Голомт" цогцолбор сургуулийн бага сургууль, 160 дугаар сургууль, 307 дугаар цэцэрлэгийг үйл ажиллагааг түр хугацаанд цахим хэлбэрт шилжүүлээд байгаа билээ. Үүнтэй холбогдуулан Налайх эрүүл мэндийн төвөөс халдварын тохиолдолтой холбоотой мэдээлэл өглөө. 

Менингококкоор өвдсөн 3 настай хүү ХӨСҮТ-ийн сэхээн амьдруулах эрчимт эмчилгээний тасагт эмчилгээ хийлгэж байгаа бөгөөд одоогийн байдлаар хүүхдийн биеийн байдал хүнд байна. Нэмэлтээр тууралт гараагүй аж. Хүүхдийн эмчилгээ хэвийн үргэлжилж байна.

Халдварын гарсан голомтыг хамгаалалтад авч ариутгасан. Онцгой комисс өнгөрсөн шөнө хуралдаж бүх цэцэрлэг, сургуульд цэвэрлэгээ ариутгалыг хийжээ.

Налайх дүүргийн эрүүл мэндийн төвийн дарга Л.Байгаль:

-Халдвар авсан хүүхдийг өчигдөр өглөө эмнэлзүйн шинж тэмдгээр нь хүлээж авч яаралтай эмчилгээнд оруулсан. Эрүүл мэндийн сайдын 2008 оны 37 тоот тушаалын дагуу мэдээллийг шууд ХӨСҮТ, ЭМЯ, НЭМҮГ-т өгч ажилласан. Мөн эрүүл мэндийн төвөөс тандалтын багийг шуурхай гаргаж, ойрын болон холын хавьтлуудыг судалсан. Өнөөдрийн байдлаар батлагдсан тохиолдол нэг байна. 

Тухайн халдварын сэжигтэй тохиолдол бүртгэгдсэн хүүхэд энэ сарын 28-ны шөнөөс халуурч эхэлсэн. Ээж нь тухайн шөнөдөө халуун бууруулах эмчилгээ хийсэн ч өглөө босоход биеэр нь их хэмжээний тууралт гарч улмаар өрхийн эмнэлэгтээ очсон. Хүүхэд хордлого их, биеийн байдал маш хүнд эмнэлэгт хүргэгдсэн. Бид тохиолдол батлагдсан даруйд эмч нарын шуурхай баг гарсан. 

Халдварын тохиолдол илэрсэн хүүхэд ХӨСҮТ-ийн сэхээн амьдруулах, эрчимт эмчилгээний тасагт эмчлүүлж байгаа. 

Тандалтаар тухайн хүүхдийн явж байсан цэцэрлэгийн хүүхдүүдийн эцэг, эхчүүдийг цуглуулж тандалт шинжилгээ хийсэн. Хүүхдийн ам бүл найм. Гэрийнхнээс мөн шинжилгээ авсан. Шаардлагатай тохиолдолд хөл хорио тогтооно. Одоогоор хязгаарлалт хийх шийдвэр гараагүй. Тандалтын зургаан шинжилгээний хариу бүгд сөрөг гарсан. 

Халдварын тохиолдол бүртгэгдсэнтэй холбоотой 25 байгууллагын 41 анги танхимыг ариутгаж, бүрэн халдваргүйжүүлсэн. 

Дүүргийн хэмжээнд зохион байгуулах олон нийтийн үйл ажиллагааг тав хоног хориглосон.