​​​​​​​ТАНИЛЦ: Энэ хавар дараах 7 байршилд борооны ус зайлуулах шугам угсарна

Нийслэлийн Засаг Даргын тамгын газар, Улаанбаатар хотын Захирагчийн ажлын алба, Геодези, усны барилга байгууламжийн газартай хамтран Улаанбаатар хотыг үерийн усны эрсдэлээс хамгаалах 3 чиглэлийн дагуу 2025 онд хийх ажлын төлөвлөгөөгөө танилцууллаа.  

Тодруулбал, 

Нэгдүгээрт, Хөрсний ус зайлуулах, 

Хоёрдугаарт, Авто замын борооны ус зайлуулах шугам сүлжээ, 

Гуравдугаарт, Үерийн байгууламж байгуулах чиглэлээр тодорхой ажлууд хийхээр төлөвлөжээ.

Эдгээрээс энэ удаад авто замын борооны ус зайлуулах шугам сүлжээг угсрах талаар онцлон мэдээлсэн юм.

Энэ хавар нийтдээ 7 байршилд 15 км-ийн урттай шугам угсралтын ажлыг хийж гүйцэтгэхээр төлөвлөсөн байна. 

Тухайлбал, 

1. Баянгол дүүрэг, 4-р хороо, Төмөр замын авто зогсоол 2393 метр шугам,

2. Хан-Уул дүүрэг, 15-р хороо “Энхтайваны гүүр”-ний доод талд 1200 метр шугам,  

3. Баянгол дүүрэг, 15-р хороо, Алтай хотхоны 14-р байр орчимд 1260 метр шугам,

4. Баянгол дүүрэг, 24-26-р хороо, Энгельсийн гудамж 1003 метр шугам,

5. Хан-Уул дүүрэг, 3-р хороо, ТЭЦ-3-ын арын уулзвараас Дунд голын гүүр хүртэл 1398 метр шугам, 

6. Чингэлтэй дүүрэг, 2-р хороо, Бөмбөгөр худалдааны төв Хувьсгалын гудамж 1369 метр шугам,

7. Хан-Уул дүүрэг, 3-5-р хороо, Чингисийн өргөн чөлөө 6541 метр шугам

Эдгээр байршлуудад борооны ус зайлуулах шугам сүлжээ байгаагүй нь их хэмжээний ус бөөгнөрөн тогтож, алхах боломжгүй, хийлдэг завь ашиглан зам гарах гэх мэт иргэдэд хүндрэлтэй нөхцөл байдлыг үүсгэдэг байжээ. 

Тус ажлыг хэдий хугацаанд хийх талаар ГУББГ-ын дарга Б.Бямбасайхан  “Борооны улирал эхлэхээс өмнө цаг агаарын нөхцөл байдлаас хамааран  хүйтний эрч суларвал гуравдугаар сарын сүүлчээс, хүйтний эрч сулрахгүй удвал дөрөвдүгээр сарын эхээр шугам угсралтын ажлуудыг эхэлнэ. Тавдугаар сард багтаан дуусгахаар төлөвлөж байна” хэмээн хэллээ.  

Ц.Анужин