СУРВАЛЖИЛГА: Идэр есийн гэмээр энэ хүйтэнд "Хүчит шонхор"-ыг зорих шаардлагагүй боллоо

-25 хэмийн хүйтэнд ч  АСА аренагийн гадна талбайд бум бужигнаж, түм түжигнэж байв. Цагаан сараас наана байж болох хамгийн хүйтэн өдөр. Энэ үеэр монголчууд буузаа бэлтгэхэд хамгийн тохиромжтой гэж үздэг.  Гэтэл хамгийн хүйтэн эдгээр өдрүүдэд хаа байсан Хүчит шонхор, Нарантуул, Хархорин явна гэдэг чанга ажил. Тэгээд ч хотын төвд байх худалдааны төв, дэлгүүрүүдэд махны үнэ өндөр. 

Энэ мэт асуудлыг шийдэж чадсан нэгэн ажил бол “Махны өргөтгөсөн худалдаа”. Үүнийг иргэд ч хэлж байлаа. “Түгжрэл, хүйтэн хоёрт хоригдоод мах худалдаж авч чадахгүй байсан юм. Ашгүй гэрийн гадна байж байна” гэж хоорондоо ярилцана.  Ингээд АСА аренагийн гадна талбайд эгнэн зогссон махны машинуудаар явж үнэ ханшийг тодруулсан юм. 

 

Хонины мах 12000, үхрийн мах 14000 төгрөг

Б.Баясгалан: Хонины мах 1кг нь 12500 төгрөгөөр худалдаалж байна. Махны үнийг тогтворжуулах зорилготойгоор үйлдвэрлэлийн аргаар төхөөрсөн малыг гулуузаар болон жижиглэсэн хэлбэрээр зарж байна. 

Н.Анхбаяр: Энэхүү өргөтгөсөн худалдаанд ерөнхийдөө хонь үхрийн мах зарагдах ёстой. Одоогоор хонины мах зарж байна. Хонины мах 12500 төгрөг, үхрийн мах 14000 төгрөгөөр худалдаалж байгаа.

ХХААХҮЯ-ны хүнсний үйлдвэрийн бодлогын хэрэгжилтийг зохицуулах газрын дарга Д.Довчинсүрэн: Махны үнэ өмнө жилүүдийг бодоход нэмэгдсэн байна. Үүнтэй холбогдуулан ХХААХҮЯ, Нийслэлийн Захирагчийн ажлын алба, Мах, махан бүтээгдэхүүн экспортлогч аж ахуй нэгжүүдтэй хамтран энэхүү өргөтгөсөн худалдааг зохион байгуулж байна. Өргөтгөсөн худалдаанд хонь болон үхрийн махыг борлуулж, чанар аюулгүй байдлын хувьд шаардлага хангасан, үйлдвэрт бэлтгэсэн бүтээгдэхүүнүүд байгаа. Экспортлогч 60 гаруй аж ахуй нэгж бий. Тус аж ахуй нэгжүүд маань 2024 онд 71,7 мянган тонн буюу нийтдээ 300 гаран сая долларын экспорт хийсэн. Өнөөдрйин хувьд Хүчит шонхор захын ханштай дүйцүүлэх байдлаар худалдааг явуулж, хонины махыг 12500 төгрөгөөр, үхрийн махыг 14500  мянган төгрөгөөр зарж байна. 

Өдөр өдрөөр аж ахуй нь нэгжүүдтэй хувиар гарган энэ сарын 20-ныг хүртэл зохион байгуулна. Хуваарьтайгаар өдөртөө 10 гаруй аж ахуйн нэгжүүд ирж худалдаалалтаа хийж байна. Нийлүүлэлт, өргөжсөн худалдаа хэр үр дүнтэй байгаагаас шалтгаалан хотын баруун, зүүн бүсүүдэд энэ өргөтгөсөн худалдааг гаргах төлөвлөгөө байгаа” гэлээ. 

Үнэхээр л энэ хүйтэнд иргэдийн явдлыг багасгаж, эдийн засагт нь хэмнэлтийг бий болгож чадвал хэрэгтэй сэн. Нийслэлийн иргэд гол төлөв бөөнөөр болон баяр ёслолд зориулсан махыг Хүчит шонхор захаас авдаг. Гэтэл тэнд нь үүрийн гэгээтэй уралдан “алалцах” шахам шуураад л гайгүй ууц, өвчүү нь дуусчихдаг. Харин нийслэлийн төв болон захын байршилд өргөтгөсөн худалдааг гаргаснаар эдгээр хүндрэлийг шийдэж болох юм.

 

Энэхүү өртгөтгөсөн худалдаа нь энэ сарын 20-ны өдрийг хүртэл үргэлжилнэ.