Хятад улс шинэ журам гаргаснаар дэлхийн хамгийн том зэвсэгт хүчнийг хянах боломж хязгаарлагдаж болзошгүй

Хятад улс зэвсэгт хүчинтэй холбоотой шинэ журам баталсан нь дэлхийн хамгийн том армийн үйл ажиллагааг хянах гол эх сурвалжийг бүрхэг болгож болзошгүй алхам гэж олон улсын ажиглагчид үзэж байна. Өнгөрөгч амралтын өдрүүдэд зарласан уг журам 2025 оны гуравдугаар сарын 1-нээс хэрэгжиж эхлэх бөгөөд Хятад улс Ардын Чөлөөлөх Армиа (ХАЧА) АНУ-ын цэргийн хүчин чадалд нийцүүлэн шинэчлэх бодлоготой холбоотой аж.

Энэхүү шийдвэр нь геополитикийн хурцадмал нөхцөл байдалд үндэсний аюулгүй байдлыг хангах, төрийн нууцыг хамгаалах чиглэлээр удирдагч Ши Жиньпиний өргөн хүрээг хамарсан кампанит ажлын нэг хэсэг болж буйг шинжээчид онцолж байна. Шинэ дүрэм нь зэвсгийн шинэ систем, боловсон хүчний томилгоо, цэргийн шилжилт хөдөлгөөн зэрэг мэдээллийг нийтэлдэг Хятадын цэргийн блогчид, тоймчдын үйл ажиллагаанд ихээхэн нөлөөлж болзошгүй гэж үзэж байна.

Хятадын цэргийн сонирхогчдын нийтэлдэг олон нийтэд нээлттэй мэдээлэл нь ХАЧА-ын ажиглагчдад тус улсын армийн хөгжил, байршуулалтыг хянах чухал эх сурвалж болсоор ирсэн юм. Хятадын засгийн газраас гаргасан тайлбарт дурдсанаар энэхүү журам нь “цэргийн худал мэдээлэл түгээх”, “цэргийн нууцыг интернетэд задруулах” зэрэг асуудлыг шийдвэрлэхэд чиглэжээ.

Шинэ журмын хүрээнд онлайн орчин дахь цэргийн мэдээлэлтэй холбоотой хатуу хяналт тогтоох бөгөөд цэргийн нууц, үндэсний батлан хамгаалах технологи, үйлдвэрлэлийн нууц, бусад задраагүй мэдээллийг үйлдвэрлэх, хуулбарлах, нийтлэх, тараахыг хоригложээ.

Хориглосон жагсаалтад:

• Зэвсгийн системийг хөгжүүлэх, турших үйл явц • Цэргийн сургуулилт, байршуулалт

• Албан ёсоор зарлагдаагүй цэргийн анги нэгтгэлүүдийн зохион байгуулалт, үүрэг даалгавар, байлдааны чадвар зэрэг багтаж байна. Мөн энэхүү журам нь цэргийн мэдээлэл нийтэлдэг вэбсайт, нийтлэл, олон нийтийн мэдээллийн хэрэгсэл дээрх данс зэрэг “цэргийн мэдээллийн онлайн үйлчилгээ үзүүлэгч” хувь хүмүүс, байгууллагуудад хамаарах юм.

Эх сурвалж: CNN.COM