СТАТИСТИК: Ресторануудын орлого өмнөх оноос ₮140 тэрбумаар ӨСЖЭЭ

Үндэсний статистикийн хорооноос Монгол Улсын нийгэм, эдийн засгийн 2024 оны аравдугаар сарын үзүүлэлтийг танилцууллаа. Энэ үеэр нийтийн хоолны салбарын орлого 1.4 их наяд төгрөгт хүрч, өмнөх оны мөн үеэс 18 хувиар өссөнийг мэдээлэв. 

Тодруулбал, 

Кафе, кофе шопуудын орлого 2023 оны эхний есөн сард 91.3 тэрбум төгрөг байжээ. Харин 2024 оны эхний есөн сард 106.9 тэрбумд хүрсэн байна. Өөрөөр хэлбэл, монголчууд кофе шоп орох нь нэмэгдэж, эл салбарын орлого 15.6 тэрбум төгрөгөөр өссөн байгаа юм. 

Цайны газруудын орлого өмнөх онтой харьцуулахад 16.9 тэрбумаар нэмэгджээ. 2023 оны эхний есөн сард цайны газрууд 126.3 тэрбум төгрөгийн орлоготой ажилладаг байсан бол 2024 эхний есөн сард 143.2 тэрбумыг олсон байна.

Хамгийн их өссөн нь рестораны орлого байгаа юм. 2023 оны эхний есөн сард 688.6 тэрбум төгрөгийн орлоготой ажилладаг байсан бол 2024 оны эхний есөн сард 828.6 тэрбумын орлого олжээ. Өөрөөр хэлбэл, ресторануудын орлого өмнөх оноос 140 тэрбумаар нэмэгдсэн байна. 

Харин баар, шөнийн цэнгээний газруудын орлогын өсөлт өмнөх онуудтай харьцуулахад бага байна. Тодруулбал, 2021 оны эхний есөн сард баарны орлого 10.1 тэрбум төгрөг байжээ. 2022 оны эхний есөн сард 31.8 тэрбум болж огцом нэмэгдсэн байгаа юм. 2023 оны эхний есөн сарынх 38.3 тэрбум бол 2024 оны эхний есөн сард 41.3 тэрбум төгрөг болж 3 тэрбум төгрөгөөр өсжээ.

Нийтэд нь харьцуулахад, монголчууд цайны газар, баар зэрэг газруудаар үйлчлүүлэх нь багасаж, кафе, ресторанаар үйлчлүүлэх нь нэмэгдэж байна.