Шатрын их мастер Б.Мөнгөнтуул Монакогийн Гран-При тэмцээний тэргүүлэгчтэй оноогоор тэнцлээ

Дэлхийн шилдэг эмэгтэй шатарчдын Гран-При ангиллын гурав дахь цуврал болох Монакогийн Гран-При тэмцээн  эдгээр өдрүүдэд үргэлжилж байна.

Өнгөрсөн Бямба гарагт болсон тавдугаар өргийн тоглолтод олон улсын мастер, гавьяат тамирчин Б.Мөнгөнтуул тус тэмцээнийг тэргүүлж буй Оросын их мастер Катерина Лагнотой /GM/ цагаанаар тоглож хайнцлаа. Энэ өргийн бүх тоглолт тэнцээгээр өндөрлөсөн байна. Эхний өрөгтөө дэлхийн 12 дахь аварга Александра Костенюкийг цагаанаар тоглож хожсон тэрбээр дөрөв дараалан хайнцаж, 3 оноотой болсноор Лагногийн дараа тэмцээний хүснэгтийн "хоёрдугаарт" бичигдэж байна.

Өнөөдөр (2025.02.24) зургаадугаар өргийн тоглолтууд болно. Энэ өрөгт Б.Мөнгөнтуул дэлхийн чансаанд 2492 оноотой байгаа Казахстаны Бибисара Ассаубаева-тай хараар тоглох юм. 80 мянган еврогийн шагналын сантай энэ удаагийн Гран-при тэмцээнд олон улсын мастер /IM/ Б.Мөнгөнтуулаас гадна Хятадын их мастер /GM/ Тан Жонгуй, Оросын их мастер Александра Горячкина, их мастер Катерина Лагно, Энэтхэгийн их мастер Хюмпи Конеру, их мастер Харика Дронавали, Казахстаны олон улсын мастер Бибисара Ассаубаева, Швейцарын их мастер Александра Костенюк, Испанийн олон улсын мастер Сара Хадем, Германы их мастер Элизабет Пэйтз нар өрсөлдөж байна.