ХӨНДӨХ СЭДЭВ: Урлагийнхны байгаа царай

Соёл урлагийн салбар нь нийгэмд олон чухал үүрэг гүйцэтгэдэг. Манайх шиг ажилгүйдэл, ядуурал нь тогтмол өсөлттэй, төгрөгийн ханш нь суларсаар байгаа улс оронд ч зохих үүргээ гүйцэтгэвэл түүхийн нэгэн үеийг даван туулахад чухал нөлөөтэй гэж үздэг. Соёл урлаг нь өнгөрсөн үеийн соёл, зан заншлыг өвлүүлэн тээж, орчин цагийн урсгал чиглэлийг өөрийн улс оронд дэлгэрүүлдэг.  Мөн соёл урлагийн үйл ажиллагаа, арга хэмжээ нь хүмүүсийг нэгтгэн, нийгмийн хэм хэмжээг бий болгоход томоохон нөлөөтэй. Цаашилбал, соёл урлаг нь сэтгэл зүйн тайвшрал, стрессийг бууруулахад ч тусалдаг.

Гэтэл начир дээрээ бидний эргэн тойронд буй "урлагийнхан" бас л бүтэхгүй хэдэн нөхөр байгаа бололтой. Олонхыг хамаатуулж нэрлэж байгаа ч цөөн хэдэн чадварлаг уран бүтээлчдээ муулж болохгүй. Гэхдээ олон нийтэд нөлөөлж буй хэд нь бүр утгаа алдаж ёстой л "бурхангүй газрын бумба" болчихлоо.

Хэн ч, хаана ч үзэх боломжтой хэдхэн кинонд тоглодог жүжигчид нь байсхийгээд л нэг асуудалд орооцолдож, эсвэл лайв хийгээд явчихна. Бас болоогүй зан авир, хууч зан нь хөдөлдөг бололтой энд тэнд хүн алгадаж, зодож цохиод л явна. Жишээ татахад, жүжигчин Б.Амарсайхан Halloween-ий баяраар хүүхдүүдийг “хаалга нүдлээ” гэж уурлан, лифтэнд зодсон гэх. Уг хэргийг цагдаагийн байгууллага шалгаж эхэлсэн. Мөн реппер Roockie "CU" сүлжээний дэлгүүрт танхайрч, ажилтных нь биед халдсан бичлэг цацагдсан.

Хэдийгээр өнгөрсөн зун гарсан хэрэг хэмээн мэдэгдэл гаргасан ч өсвөр насны хүүхэд алгадаж, танхайрсан нь үнэн. Мөн жүжигчин Т.Бадамжав, Б.Мишээл, Б.Номин нар СУИС-ийн дүү нараа дээрэлхдэг байсан тухай мэдээлэл цацагдаж нэлээд шуугиулсан.  Эдгээр цөөхөн жишээ бол уур цухал аа бусдад гаргасан увайгүй үйлдлийн илрэл. Гэтэл хувь хүний гаргах үйлдлээс цаашлаад асуудал мундах юм биш.

Нэг нэгнийхээ уран бүтээлийг хулгайлна, өөр салбар мөнгө илүү олоод байгаа юм шиг санаад дуучин нь жүжиглэж, жүжигчин нь дуулдаг болсон. Өөр хийх юм байвал хийж л орхино. Дуучин Б.Идэржавхлан, жүжигчин З.Онон нар нийгэмд эерэг нөлөөтэй хэмээн сайшаагдаж байсан ч оюуны өмчийн нэлээн маргаантай тоглолт хийх гэж буй. Жүжигчин нь жүжиглэж, дуучин нь дуулахдаа анхаарч жаахан чанартай юм хийх зав байхгүй бололтой.  Шахах билет байвал шахна.

Тэдгээрийг нь харахаар өнөөх нийгэмд соён гэгээрлийн үүргийг гүйцэтгэх бүтээл огт биш. Хаана тэр хүмүүсийг нэгтгэн, нийгмийн хэм хэмжээг бий болгох тоглолт болоод байна вэ. Сэтгэл зүйн тайвшрал, стрессийг бууруулах, сэтгэлийн тэнцвэрийг олж авахад туслах нь бүү хэл хооронд нь маргалдуулж, цахим ертөнцийг самарч л сууна даа. Олигтой ганц кино сүүлийн хэдэн жил тоотой хэд гарсан даа. Ингээд харахаар хуучны чанартай, өгүүлэмжтэй бүтээл, уран бүтээлчийн төрөлт эрс буурчээ. Ингээд "бурхангүй газрын хэдэн бумба"-тайгаа эвлэрээд хэрхэхийг нь утсаараа чагнаж л суух хувь тавилантай ч байх гэж.

Бидний ирээдүй болсон хүүхдүүд чухам эдгээр "бумба"-нуудыг л үзэж, харж өсөж буй. Гэтэл нэмээд тэднийгээ бүр яамнаас нь мөнгө гаргаж үнэгүй үзүүлж, сурталчилах болчихдог, азгүй улс аа бид.