Н.Учрал: Иргэд, ААН-үүд "үйлчилгээ явууллаа” гэдгээ мэдэгдээд шууд үйл ажиллагаагаа эхэлдэг болно

Засгийн газрын өнөөдрийн (2025.03.26) хуралдаанаар Зөвшөөрөл олгох үйл ажиллагааг хөнгөвчлөх, цахим хэлбэрт шилжүүлэх, холбогдох захиргааны хэм хэмжээний актуудыг хуульд нийцүүлэх чиглэлээр авч хэрэгжүүлсэн арга хэмжээний талаар хэлэлцжээ. Энэ талаар ЗГХЭГ-ын дарга Н.Учрал дараах мэдэгдлийг хийлээ.

Тэрбээр, “Өнгөрсөн хугацаанд Зөвшөөрлийн хуулийн дагуу 371 зөвшөөрөл байсан. Зөвшөөрлийн хуулийг давсан ЗГ-ын тогтоол, шийдвэр сайдуудын тушаал, захиргааны хэм хэмжээний актуудыг цуцалсан. Өнөөдрийн байдлаар 50 захиргааны хэм, хэмжээний актыг бүрэн цуцалсан. Ингэснээр төрийн үйлчилгээг хүнд сурталгүй авах, давхардсан чиг үүргүүдийг цуцалсан. 170 зөвшөөрөл бүрэн цахимжсан. Зөвшөөрөл авах гээд очихоор иргэний үнэмлэх нэхэж, нотариатаар батлуулахыг шаарддаг, төр өөрт байгаа мэдээллийг иргэнээс нэхдэг гэх гомдол 11-11 төв дээр ирдэг.

Бодит байдал дээрээ цаасаар бичиг баримт нэхдэг байдал үргэлжилсээр байна. Үүнийг шийдвэрлэхийн тулд 170 зөвшөөрлийг бүрэн цахимжуулсан. Тиймээс иргэдээс баримт бичиг нэхсэн яам,тамгын газар, агентлаг бусад холбогдох газруудад хариуцлагыг тооцно. Үүний цаана авлигатай тэмцэх бодлого, нээлттэй ил тод байдал явна. Зөвшөөрөл авах үед нь олон бичиг баримт шаардаад хүнд суртал үүсгээд, нэхсэн бичиг баримтыг нь бүрдүүлээд өгөхөөр нөгөө албан тушаалтан нь мартчихдаг. Дахиж сунгах үед нь л санадаг. 

Зөвшөөрөл, мэдэгдлийн хууль, Стандартын хууль гарснаар төр нэг сувгаар иргэдтэйгээ харьцах боломж бүрдэнэ.  Тиймээс Зөвшөөрөл, мэдэгдлийн хуулийг УИХ-д өргөн мэдүүлэхээр боллоо. Зөвшөөрөл, дүрэм журмын шинэчлэл нь үндсэндээ иргэдэд эрүүл аюулгүй орчинд амьдрах таатай нөхцөлийг бүрдүүлэх бололмжийг бий болгоно. Энэ хууль батлагдсанаар төрийн үйлчилгээ иргэдэд шууд хүрэх боломжийг бүрдүүлнэ” гэв.