"Улаанбаатар марафон 2025”-д 2500 гаруй хүн бүртгүүлжээ

“Улаанбаатар марафон 2025” олон улсын гүйлтэд оролцогчдын бүртгэл 2025 оны дөрөвдүгээр сарын 1-нд эхэлсэн. Өнөөдрийн /2025.04.22/ байдлаар зургаан төрөлд нийт 2544 иргэн бүртгүүлжээ. Үүнээс 50 орчим хувь нь 5 км-ийн зайд гүйгчид байна.

Тус зайд гүйгчдийг 12-17 нас, 18 наснаас дээш гэсэн хоёр ангиллаар бүртгэдэг. Мөн өнөөдрийн байдлаар 5 км-ийн зайд 1300 орчим хүн, 10, 21 км-т тус бүр 400 гаруй хүн гүйхээр бүртгүүлжээ. Харин 42 км-ийн зайд гүйхээр 101 хүн бүртгүүлээд байна.

Энэхүү марафоны хамгийн бяцхан оролцогчид гүйх боломжтой төрөл болох гэр бүлийн гүйлтэд 190 гаруй иргэн гүйхээр бүртгүүлсэн байна.

 

Жил бүр “Улаанбаатар марафон” олон улсын гүйлтэд оролцогчдын тоо нэмэгдэж байна. 2023 онд нийт 13,000 орчим хүн олон улсын гүйлтэд албан ёсоор бүртгүүлж оролцсон бол өнгөрсөн жил уг тоо хоёр дахин өсөж 30,000 хүн бүртгүүлж, гүйсэн юм.

Марафонд гүйх хүсэлтэй иргэд https://ulaanbaatar.marathon.mn/ цахим хаягаар болон “Hipay” аппликейшнээр бүртгүүлэх боломжтой. Бүртгүүлсэн хүмүүст энгэрийн дугаар олголт тавдугаар сарын 10-20-ний хооронд үргэлжилнэ.