Утааны хордлогоос сэргийлэх нь: Өдөр бүр 200 мл сүү ууж, долоо хоногт нэг удаа ууланд алхаарай

Утааны хордлогоос хэрхэн сэргийлэх талаар Хоол боловсруулах эрхтэн судлалын эмч, Анагаах ухааны доктор Т.Цэрэнтогтох зөвлөгөө хүргэжээ. 

Тэрбээр "Утаанаас болж уушгинд тортог суух эрсдэл өндөр байна. Энэ үед иргэдийг хөдөлгөөн сайн хийхийг зөвлөмөөр байна. Агаарын бохирдолтой үед хүний биед хамгаалах тогтолцоо ажиллаж байгаа учраас хамгийн бага агааржуулалтаар амьсгалж байдаг. Энэ үед ууланд алхах, цэвэр агаарт гүйх зэргээр хөдөлгөөн хийж, уушгийг тэлэх хэрэгтэй. Ингэснээр биед орсон жижиг тортгийг ханиалгаж гаргаж, уушгийг цэвэршүүлэх нөхцөл үүсгэдэг. Тиймээс долоо хоногт нэг удаа ууланд алхаж хэвшээрэй. 

Мөн дэлгүүрүүдэд худалдаалагддаг савтай сүү биш литрийн сүүнээс өдөрт 200 мл-ийг ууж байх хэрэгтэй. Ингэснээр хордлого тайлагдана" гэсэн байна.