Э.Нандинболор: Цоо эрүүл хүүг маань зүрх судасны өвчтэй, бөөрний өрөвсөлтэй гэж дүгнэсэн

Ой хоёр сартай хүүхэд өдөр өнжүүлэх дээрээ хахсан байж болзошгүйгээр харамсалтайгаар нас барсан хэрэг өнгөрсөн сарын 28-нд гарсан. Уг хэрэгтэй холбогдуулан хүүхдийн ар гэрийнхэн мэдээлэл өглөө. Шүүх шинжилгээний ерөнхий газраас мэдээллийг шууд дамжуулан хүргэж байна. 

Э.Нандинболор: "Анх багш нь над руу залгахдаа "танай хүүхэд унтаж сэрээд царай нь сонин болоод, одоо эмнэлэг явж байна" гэж хэлсэн. Гэтэл цэцэрлэг дээрээ нас барсан байхад эхлээд цагдаад дуудлага өгчхөөд над руу ярьсан байгаа юм. Багш нь "хоолоо идчихээд унаад өгсөн. Тэгээд унтчихжээ гээд өлгийдөөд орон дээр нь аваачсан" гэж хэлсэн. Яагаад хүүхэд амьсгалахгүй байгааг шалгаагүй юм. Энэ бол цэвэр багшийн хариуцлага алдсан асуудал.  Шинжилгээний хариуг бидэнд хэлэхдээ зүрх судасны өвчтэй, бөөрний өрөвсөлтэй байсан гэж хэлсэн. Тийм байх боломжгүй. Төрснийхөө дараа 2-3 сар хамрын салст хөөсөн тул амьсгал нь хүндрэлтэй байсан. Гэхдээ түүнээс цааш ямар ч зовуурьгүй байсан. Анх гэртэйгээ ойрхон өдөр өнжүүлэх олчхоод шууд аваачиж өгсөн. Ямар ч гэрээ гаргаж өгөөгүй, тухайн үед асуугаагүй нь миний буруу. Бид шүүх шинжилгээний газрын дүгнэлтийг хүлээн зөвшөөрөхгүй, дахин шинжээч томилуулж ажиллахаар болсон" гэлээ. 

Харин Шүүх шинжилгээний ерөнхий газрын Бүртгэл мэдээлэл технологийн хэлтсийн дарга Ц.Мөнхбат: "Хэрэг явдал болсны дараагаар нэн даруй шинжээч томилон ажилласан.  11 сарын 15-ны доторх шинжээч эмч дүгнэлтээ гаргана гэж тогтоосон байсан. Улмаар дүгнэлтээ шинжилгээг хариуцсан дарга нь хүлээн аваад хуулийн хугацаанд дүгнэлтээ гаргасан. Шинжилгээний хариуг нас барсны дараа маш хурдан гаргах боломжгүй.  Хуулийн дагуу ар гэрийнхэн шинжилгээний хариутай санал нийлэхгүй байж болно. Шинжээчийн дүгнэлтийг бид ч мэдэхгүй. Тухайн дүгнэлтийг шинжээч эмч өөрөө бүрэн хариуцдаг. Дахин шинжилгээ хийх тохиолдолд өмнөх эмчийг оролцуулахгүйгээр, шинээр гурван эмч томилон ажиллахаар тусгасан байдаг. Дүгнэлтийн тухай бид мэдээлэл өгөх боломжгүй, хуулийн хүрээнд шинжилгээ хийсэн эмч өөрөө өгөхөөр бусдаар задруулах боломжгүй" гэж мэдээллээ.