Т.Батболд: Телеграмм апплекейшнийг аль болох ашиглахгүй байхыг зөвлөж байна

Сүүлийн үед телеграмм апплекейшнээр дамжуулан иргэдээс их хэмжээний мөнгө залилах гэмт хэрэг ихэсжээ. 

Тодруулбал энэ оны долоодугаар сараас эхлэн цагдаагийн байгууллагад “Гар утасны Телеграм аппликейшнийг ашиглан “цагийн ажил буюу даалгавар биелүүлэх ажил хийж, мөнгө өсгөж өгнө” гэсэн зарын дагуу мөнгө байршуулж залилуулсан” гэх гомдол, мэдээлэл нэмэгдэж, сүүлийн дөрвөн сарын хугацаанд 619 гэмт хэрэг бүртгэгджээ. Улмаар шалгагдаж байгаа иргэдэд нийт 10 гаруй тэрбум төгрөгийн хохирол учруулсан байна.
ХХЗХ-ны Зохицуулалтын газрын дарга Т.Батболд:

-Телеграмм апплекейшнээр дамжиж маш их залилан явагдаад байгаа. Тэгэхээр энэ телеграмм апплекейшнийг аль болох ашиглахгүй байхыг зөвлөж байна. Мөн ашигласан тохиолдолд settings цэс рүүгээ ороод privacy нууцын тохиргоогоо маш сайн хийх хэрэгтэй. Зөвхөн өөрийн contact-д байх хүмүүс чинь өөртэй чинь холбоо барьж болдгоор тохиргоогоо хийчих юм бол ямар нэгэн цахим залилангийн группүүд рүү уригдаж орохгүй гэсэн үг.

Бид Цагдаагийн ерөнхий газар болон Монгол банктай хамтраад цахим залилан мөрийтэй тоглоомтой холбоотой ажлууд дээр оролцоод явж байгаа.

2022 оноос хойш бид 5600 орчим мөрийтэй тоглоом, домэйн хаягийн хязгаарлалт хийсэн. Фейсбүүк дээр 2024 онд 1900 орчим групп, чатуудыг хаалгасан. Зөвхөн мөрийтэй тоглоом цахим залилантай холбоотой гэсэн үг.

Телеграмм апплекейшний хувьд гэх юм бол бид яг одоогийн байдлаар судлаад явж байгаа. Холбогдох эрх бүхий байгууллагаас Цагдаагийн байгууллагатай хамтраад телеграммын компанитай холбоо тогтоохоор ажиллаж байгаа. Холбоо тогтоосон тохиолдолд тухайн цахим залилан хийгээд байгаа хаягууд, утасны дугааруудыг хаалгах, хэрэглэгчийн мэдээллийг авах талаар хамтарч ажиллах байх.

Харилцаа холбооны зохицуулах хорооноос эхний ээлжид хийж байгаа ажлууд бол телеграмм дээр яаж хувийнхаа аюулгүй байдлыг хангах вэ, settings цэс рүүгээ ороод privacy тохиргоогоо яаж зөв хийвэл та хэн нэгэн дурын хүнээр нэг групп рүү оруулаад тэр дээр даалгавар өгөөд залиланд өртөх эхний алхам хийгдэхгүй байх вэ гэдэг дээр анхаарлыг хандуулаад зөвлөгөөг хийгээд дууссан.