Н.Учрал: Эрчим хүч, дэд бүтэц, хөнгөн үйлдвэрлэлийн салбаруудад хөрөнгө оруулалтыг илүүтэй чиглүүлнэ

“Монгол-Хятадын экспо” тав дахь удаагаа БНХАУ-ын Өвөр Монголын Өөртөө Засах Орон (ӨМӨЗО)-ы Хөх хотноо 2025 оны наймдугаар сарын 25-31-ны өдрүүдэд зохион байгуулагдаж байна. Тус экспогийн нээлт наймдугаар сарын 25-нд болж, энэ үеэр Тэргүүн шадар сайд бөгөөд Эдийн засаг, хөгжлийн сайд Н.Учрал үг хэлэв.

Түүний хэлсэн үгийг бүрэн эхээр нь хүргэж байна. 

Бүх Хятадын Ардын Төлөөлөгчдийн Их Хурлын Байнгын хорооны орлогч дарга Эрхэм хүндэт Цай Дафөн, Бүгд Найрамдах Хятад Ард Улсын Худалдааны яамны дэд сайд Янь Дун,Өвөр Монголын Өөртөө Засах Орны Намын хорооны нарийн бичгийн дарга Сун Шаочэн, Өвөр Монголын өөртөө засах орны Ардын Засгийн газрын Тэргүүлэгч Ван Ли Шя,Эрхэм хүндэт зочид, төлөөлөгчид, хатагтай, ноёдоо,

Ажил үйлс дэлгэрсэн, арвин ургацаа хураах энэ намрын сайхан цагт Монгол, Хятадын хамтын ажиллагааны нэгэн чухал индэр болсон “Монгол–Хятадын 5 дахь удаагийн ЭКСПО”-гоор та бүхэнтэй уулзаж байгаадаа баяртай байна.

Энэхүү арга хэмжээг амжилттай зохион байгуулж буй Монгол, Хятад хоёр улсын төр, орон нутгийн байгууллага, бизнесийн төлөөлөгчдөд Монгол Улсын Засгийн газрын нэрийн өмнөөс гүн талархал илэрхийлье.

“Монгол–Хятадын ЭКСПО” жилээс жилд цар хүрээгээ тэлж, зөвхөн хоёр улсын төдийгүй бүс нутгийн бизнес эрхлэгч, хөрөнгө оруулагчдыг холбосон олон улсын шинжтэй арга хэмжээ болон өргөжин тэлсээр байна.

Энэ нь хоёр орны иж бүрэн стратегийн түншлэлийн харилцааны бодит илрэл юм. Монгол, Хятад хоёр улс 4,700 гаруй км урт газар нутгаар хиллэсэн мөнхийн хөршүүд билээ.

Сүүлийн жилүүдэд төрийн өндөр түвшний айлчлал, яриа хэлэлцээний давтамж тогтмолжиж, улс төрийн итгэлцэл гүнзгийрэн, худалдаа, эдийн засгийн хамтын ажиллагаа бодит үр дүнгээ өгч буй нь хоёр орны ард түмний харилцаа, улс орны хөгжилд жинтэй хувь нэмэр оруулж байна.

Мөн хоёр улсын удирдагчдын манлайлал, чиглэл дор Монгол, Хятадын Иж бүрэн стратегийн түншлэлийн харилцаа бүхий л салбарт өргөжин хөгжиж, хамтын ажиллагааны илүү олон боломж, талбарыг бий болгож буйг онцлон тэмдэглэх нь зүйтэй.

БНХАУ нь олон жилийн турш Монгол Улсын худалдаа, хөрөнгө оруулалтын голлох түнш байсаар ирсэн бөгөөд 2024 онд хоёр талын худалдаа 19.1 тэрбум ам.долларт хүрч, Монгол Улсын нийт худалдааны 70 орчим хувийг эзэлж байгаа нь худалдааны эргэлтийг 20 тэрбум ам.долларт хүргэх хоёр улсын төрийн тэргүүн нарын тохиролцсон зорилт тун удахгүй биеллээ олж, цаашид улам нэмэгдэх боломжтойг харуулж байна.

Гэхдээ бидний зорьж буй энэхүү худалдааны эргэлтийн бүтэц нь харьцангуй цөөн тооны салбарыг хамарсан хэвээр байна.

Иймд Монгол Улсын Засгийн газраас онцгой анхаарч худалдааны хэмжээг нэмэгдүүлэхийн сацуу бараа бүтээгдэхүүнийхээ нэр төрөл, бүтцийг нэмэгдүүлэх, сайжруулах, нэмүү өртөг шингэсэн эцсийн бүтээгдэхүүн болон уул уурхайн бус бүтээгдэхүүний экспортыг дэмжих бодлого хэрэгжүүлж байна.

Ингэснээр хоёр улсын худалдаа илүү солонгорсон, тэнцвэртэй, тогтвортой хөгжих боломж бүрдэх юм.

Монгол Улсын Засгийн газар 2024-2028 оны үйл ажиллагааны хөтөлбөрийн хүрээнд улс орны хөгжил цэцэглэлтийг урагшлуулж, ард иргэдэд үр өгөөжөө өгөх 14 мега төслийг хэрэгжүүлэхээр төлөвлөсөн билээ.

Эдгээр төслүүдээс БНХАУ-тай хамтран ажиллах бүрэн боломж байгаа ба үүний хамгийн тод жишээ бол энэ оны тавдугаар сард эхлүүлсэн Гашуунсухайт-Ганцмод боомтын хил дамнасан төмөр замын бүтээн байгуулалтын төсөл яахын аргагүй мөн юм.

Энэ нь 70 жилийн дараа хоёр улсын хооронд шинээр төмөр замын холболт хийсэн түүхэн үйл явдал болсон чухал төсөл мөн.

Цаашид хөрөнгө оруулалтыг нэмэгдүүлэхийн зэрэгцээ байгаль орчинд ээлтэй, шинэ технологи нэвтрүүлэх, уул уурхайн бус ялангуяа эрчим хүч, дэд бүтэц, хүнд болон хөнгөн үйлдвэрлэл зэрэг салбаруудад хөрөнгө оруулалтыг илүүтэй чиглүүлэх, дэмжих замаар хөрөнгө оруулалтын бүтэц, чанарыг сайжруулахыг зорьж байна.

Хүндэт зочид, бизнес эрхлэгчид ээ,

Монгол Улс нь сүүлийн жилүүдэд гадаад худалдааны бодлогоо идэвхжүүлэн, олон улсын эдийн засгийн интеграцид бодитойгоор оролцож байгаа бөгөөд гадаад худалдааны нээлттэй, олон талт, экспортод чиглэсэн бодлогыг баримталж, үйлдвэрлэгч, экспортлогч компаниудад илүү өргөн зах зээлд хүрэх боломжийг нээж өгөхөд анхаарч байна.

Монгол Улсын Засгийн газраас эдийн засгийг төрөлжүүлэх, макро эдийн засгийн тогтвортой байдлыг хадгалж, шударга өрсөлдөөний орчныг бүрдүүлэх зорилгоор бизнесийн орчны тулгуур бодлогыг оновчтой хэрэгжүүлж, ялангуяа гадаад худалдаа болон хөрөнгө оруулалтын хууль, эрх зүйн орчныг сайжруулахаар бодитой арга хэмжээг үе шаттай авч хэрэгжүүлж байна.

Тухайлбал, Гадаадын хөрөнгө оруулалтын тухай хууль, Зөвшөөрлийн тухай хууль, Худалдаа, аж үйлдвэрийн танхимын тухай хууль зэрэг бизнесийн эрх зүйн орчныг тодорхойлсон баримт бичгүүдийг цогцоор нь шинэчилж, Төр, хувийн хэвшлийн түншлэлийн тухай хуулийн нэмэлт, өөрчлөлтөөр аймаг, орон нутагт түншлэлийн төслийг бие даан хэрэгжүүлэх боломжоор тэгш хангаж, төсөлд тавигдах шаардлагыг оновчтой болгохоор тус тус тусгасан.

Эдийн засгийн нөхцөл байдал, хууль эрх зүйн орчин сайжирч байгаа энэ үед уул уурхайн бус салбаруудад импортыг орлож, экспортыг дэмжихэд чиглэсэн томоохон төсөл, хөтөлбөрүүдийг манай хоёр улсын бизнес, аж ахуйн нэгжүүд хамтран хэрэгжүүлэх өргөн боломж бий.

Эрхэм нөхөд өө,

Энэхүү ЭКСПО-ийн үеэр худалдаа, хөрөнгө оруулалтын хамтын ажиллагааны олон гэрээ, хэлцэл байгуулагдаж, соёл урлагийн олон төрлийн солилцооны арга хэмжээ зохиогдож, хоёр орны ард түмний харилцан ойлголцол, найрамдлыг улам бэхжүүлэхийн зэрэгцээ шинжлэх ухаан, инновац технологи, худалдаа, хөрөнгө оруулалт, хөдөө аж ахуй, анагаах ухаан, соёл, байгаль хамгаалал зэрэг бүхий л салбарыг хамарсан мэдээлэл солилцох, харилцаа холбоо тогтоох орчныг бүрдүүлж байна.

Дэлхий дахинд улс төр, эдийн засгийн сорилт ихэсч буй энэ үед хөрш орнуудын хамтын ажиллагаа урт хугацааны тогтвортой хөгжил, бүс нутгийн энх тайванд чухал хувь нэмэр оруулах учиртай. Иймд төр, хувийн хэвшил, бизнес эрхлэгч, хөрөнгө оруулагч Та бүхнийг энэ ЭКСПО-ийн боломжийг бүрэн ашиглаж, ажил хэрэгч яриа өрнүүлэн, шинэ хамтын ажиллагааны эхлэлийг тавихыг уриалж байна.

“Монгол-Хятадын 5 дахь удаагийн ЭКСПО”-д өндөр амжилт хүсье.

Анхаарал тавьсанд баярлалаа.