Төсвийн 18.3 тэрбум төгрөгийг Ч.Номин сайдын нөхрийн компани авах уу

Соёлын сайд Ч.Номин 18.3 тэрбум төгрөгийг яагаад үнэгүй үзвэр, үйлчилгээний ваучер нэрийдлээр тараах гээд байгаагийн цаад шалтгаан нь түүний нөхөртэй холбоотой аж. Учир нь монголд хамгийн томд тооцогдох кино зураг авалтын павильоныг түүний нөхрийн Ори Студиос ХХК байгуулсан. Мөн нөхөр Г.Бат-Эрдэнэ нь Монгол телевизийн Стратеги, бодлого төлөвлөлт хариуцсан дэд захирал, Монголын Телевизүүдийн Холбооны ТУЗ-ийн даргын албыг хашдаг нэгэн.
Тэгвэл Ч.Номин нь сайд болсон даруй боловсруулсан хамгийн анхны хуулийн төсөл нь “Монголд кино зураг авалт хийсэн гадаад компани зардлынхаа 45% хүртэл хувийг буцааж Монгол Улсаас авах боломжтой” гэх тухай юм.

Ингэхдээ буцаан олголтыг авахад шаардлага хангах ганц компани нь нөхрийнх нь компани байхаар хуульчилсан байна. Өөрөөр хэлбэл, гадаад компанийн зураг авалтын зардлын 45%-ыг төрийн сангаас төлөөд, эргээд тэр мөнгө нь нөхрийнх нь студи руу орж байгаа гэсэн үг.

Ори Студиос ХХК-ийн тухайд Монгол HD телевизийн санаачилгаар 2020 онд үүсгэн байгуулагдсан. “Ори Студиос” төслийг санаачлагч нь мөн л дээрх эхнэр, нөхөр хоёр. 
Ори Студиос ХХК нь “Монголын контент үйлдвэрлэлийн оролцогчдыг чадавхжуулж, медиа салбарын нэгдсэн төв байгуулах, ОУ кино багтай хамтран ажиллаж МУ-ын бүтээл үйлдвэрлэлийн экспортыг нэмэгдүүлэх, эх орноо сурталчлан таниулах, импортыг орлох бүтээлч үйлдвэрлэлийн салбарыг хөгжүүлэх замаар ДНБ-д эзлэх хувь хэмжээг нэмэгдүүлэх” зорилготой хувийн өмчит компани.

Ингээд харахаар соёлын үзвэр үйлчилгээ үзүүлэх, кино контент бэлтгэн хүргэх бүх талын стандартыг хангасан гэх нөхрийнх нь компани төсөвт суулгасан 18.3 тэрбум төгрөгийг авах магадлалтай байгаа юм. Мөн цаашлаад  “Монгол HD” телевизийн бэлтгэн хүргэдэг маш олон контент, нэвтрүүлэг нь ч төрөөс санхүүжээд зогсохгүй тус телевиз төсвийн мөнгөөр, ард түмний татварын мөнгөөр санхүүжих бололтой.