БНСУ-ын Ерөнхий сайд асан Ли Хэ Чан Вьетнамд нас барав

Өмнөд Солонгосын Ерөнхий сайд асан Ли Хэ Чан Ням гарагт Вьетнамд ажлын айлчлал хийж байхдаа 73 насандаа таалал төгсжээ.

Энх тайвныг эрхэмлэгч нэгдлийн зөвлөлийн (PUAC) ахлах дэд ерөнхийлөгчөөр ажиллаж байсан Ли Хо Ши Мин хотын эмнэлэгт зүрхний шигдээс болсны улмаас орон нутгийн цагаар 14:48 цагийн орчимд нас барсан аж. Тэрээр Пүрэв гарагт ханиад томуу төст шинж тэмдэг илэрсэн гэж байсан бөгөөд биеийн байдал нь муудсаны дараа Баасан гарагт гэртээ харихаар бэлдэж байжээ.

Гэвч Хо Ши Мин хотын Тан Сон Нхат олон улсын нисэх онгоцны буудалд буцах нислэгээ хүлээж байхдаа амьсгаа нь давчдаж, Баасан гарагт яаралтайгаар эмнэлэгт хүргэгдэх үедээ зүрх нь зогссон байна. Түүнд стент суулгах мэс засал хийлгэсэн боловч хожимдож нас баржээ.

Лигийн цогцсыг Вьетнамын цэргийн эмнэлэгт хадгалж байгаа бөгөөд өнөөдөр буюу Даваа гарагийн орой Өмнөд Солонгос руу тээвэрлэхээр төлөвлөж байна. Улмаар Мягмар гарагийн өглөө Сөүлийн баруун талд орших Инчоны олон улсын нисэх онгоцны буудалд хүргэх аж.

Долоон удаагийн хууль тогтоогчоор ажиллаж байсан Ли 2004-2006 онд Ро Му Хёны засаг захиргааны үед Ерөнхий сайдаар ажиллаж байсан юм. Тэрээр өнгөрсөн оны аравдугаар сард PUAC-ийн ахлах дэд даргаар томилогдсон. Өмнөд Солонгосын цэргийн дэглэмийн үед ардчиллын төлөөх хөдөлгөөнд оролцож, оюутны идэвхжил болон сөрөг хүчний үйл ажиллагаагаар дамжуулан улс төрд хөл тавьсан юм.

Ардчилал хөгжсөний дараа тэрээр 1988 онд Үндэсний Ассемблейд элсэж, дараа нь Ким Дэ Жуны засаг захиргааны үед Боловсролын сайд, Ро Му Хёны засаг захиргааны үед Ерөнхий сайдаар ажиллаж байжээ.

Ли нь Ким Дэ Жун, Ро Мү Хён, Мүн Жэ Ин, Ерөнхийлөгч Ли Жэ Мён гэсэн дөрвөн дэвшилтэт үзэлтэй Ерөнхийлөгчтэй дотно холбоотой байдгаараа алдартай байсан бөгөөд улс төрийн холбоотон, зөвлөхийн үүргээ гүйцэтгэснийхээ төлөө "хааныг бүтээгч" хоч авчээ.

Боловсролын сайд байхдаа тэрээр "Ли Хэ-чаны үе" гэгддэг боловсролын өргөн хүрээтэй шинэчлэлийг хэрэгжүүлсэн. 2003-2008 оны хооронд Ро Мү Хёны засаг захиргааны үед Лиг Ерөнхийлөгчийн хамгийн итгэмжлэгдсэн туслахуудын нэг гэж үздэг байсан бөгөөд түүнийг ихэвчлэн "хүчирхэг" Ерөнхий сайд гэж тодорхойлдог байв.

Рогийн улс төрийн фракцын удирдагчийн хувьд тэрээр 2012, 2017 онуудад Мүүн Жэ Иний Ерөнхийлөгчийн сонгуулийн кампанит ажлыг дэмжихэд гол үүрэг гүйцэтгэсэн. Мүүнийг сонгосноос хойш нэг жилийн дараа буюу 2018 онд эрх баригч намын дарга болсон юм.

Мөн өнгөрсөн оны зургаадугаар сард болсон Ерөнхийлөгчийн сонгуулийн өмнө Ерөнхийлөгч Ли Жэ Мёнг олон нийтийн өмнө дэмжиж байсан билээ.

"Түүний томилгоо нь Ерөнхийлөгчийн Хойд Солонгос болон нэгдлийн бодлогыг дэмжих зорилготой байсан" гэж Чон Ва Дэ өнгөрсөн оны аравдугаар сард Лиг PUAC-ийн ахлах дэд даргаар томилохдоо хэлж байжээ.

Лигийн үхлийн дараа Өмнөд Солонгосын улс төрийн хүрээнийхэн эмгэнэл илэрхийлжээ.

Эх сурвалж: Yonhap News