Испанийн өсвөр насны хүү хаягдал хуванцар саваар гудамжны нохдод дулаан үүр хийж өгчээ

Испани улсад амьдардаг нэгэн өсвөр насны хүү хаягдал хуванцар савыг хог биш, харин боломж гэж харж, гудамжны нохдод зориулсан дулаан байрууд хийж эхэлжээ.

Өвлийн улиралд агаарын температур буурах үед гудамжны нохойнууд хүйтнээс хамгаалагдахын тулд хананд наалдаж, сандлын доор шурган хэвтэж байгааг анзаарсан байна. Үүнийг харсан хүү амьтдад туслахаар шийдэж, гудамж болон дахин боловсруулах савнуудаас хоосон хуванцар сав цуглуулж эхэлжээ.

Тэр энгийн багаж ашиглан савнуудыг давхарлан шахаж, битүүмжилж зузаан хавтан болгон боловсруулсан байна. Ингэснээр бат бөх, дулаан тусгаарлах чадвартай жижигхэн нохойн байр бүтээж чаджээ.

Хийсэн нохойн байрнууд нь шалан дээрээс бага зэрэг өргөгдсөн бүтэцтэй тул чийг нэвтрэхээс хамгаалдаг. Мөн налуу дээвэртэй учир борооны ус тогтохгүй урсаж, доторх агаарын завсар нь дулааныг хадгалах тусгаарлагчийн үүрэг гүйцэтгэдэг аж. Мөн нохойн үүрнүүдийг тод өнгөөр будаж, гудамжны амьтад ихэвчлэн цуглардаг аюулгүй булан тохойд байрлуулдаг байна.

Өсвөр насны хүүгийн жижиг туршилт байсан ч энэхүү санаа нь аажмаар энэрэнгүй сэтгэлийн хөдөлгөөн болон өргөжиж эхэлжээ. Хаягдал хуванцрыг амьдралыг аврах зүйл болгон хувиргаснаар нэгэн зэрэг хоёр асуудалд анхаарал хандуулж байна. Энэ нь хуванцар хог хаягдлын асуудал болон гудамжны амьтдын зовлон юм.

Түүний хийсэн нохойн үүр бүрт дахин боловсруулсан хуванцар сав, нямбай угсарсан хавтангууд байгаа юм. 

Нас залуу байх нь сайн үйлс хийхэд саад болдоггүйг харуулж байна. Оюун ухаан, энэрэнгүй сэтгэл хосолбол хамгийн хүйтэн гудамжийг ч дулаацуулж чадна гэдгийг энэ санаачилга харуулж байна.

 

Эх сурвалж: CNN