Mxrningstar хамтлаг хүүхэд хөгжлийн өрөөнд хөгжмийн зэмсэг бэлэглэлээ

НҮБ-ын Хүүхдийн Сангийн дэмжигч Mxrningstar хамтлаг Чингэлтэй дүүргийн 22-р хорооны Хүүхэд хөгжлийн өрөөнд хөгжмийн зэмсгүүд бэлэглэж, хүүхэд багачуудыг хөгжим тоглож сурах, авьяас чадвараа хөгжүүлэх боломжийг бүрдүүллээ.

Тус хүүхэд хөгжлийн өрөө нь хүүхдүүдийн чөлөөт цагаа зөв боловсон өнгөрүүлэх, сурч хөгжих орчин байхаас гадна гэр бүлүүдэд бодит дэмжлэг үзүүлдэг онцлогтой. Өрөөний дэргэд байрлах Монгол гэрийн ЧИП дулаалгын багц үйлдвэрлэлийн танхимд хорооны иргэд, ялангуяа ээжүүд ажлын байранд бэлтгэгдэх мэдлэг, ур чадвар эзэмшиж байгаа юм.

Mxrningstar хамтлагийнхан дуу хөгжимд дуртай, өөрийгөө урлагаар илэрхийлэх хүсэлтэй хүүхэд, залуус олон байгаасай гэсэн зорилгын хүрээнд энэхүү санаачилгыг НҮБ-ын Хүүхдийн Сантай хамтран хэрэгжүүлжээ.

Хүүхдийн сайн сайхны төлөө сэтгэл зүрх, уран бүтээлээ зориулан ажиллаж буй Mxrningstar хамтлагт талархал илэрхийлье. Тэдний хөг аялгуу олон хүүхдийн зүрхэнд итгэл, мөрөөдөл, урам зориг асаасаар байх болно.