KPop Demon Hunters дэлхийг тойрсон аялан тоглолт хийхээр болжээ

KPop Demon Hunters киноны дэлхий даяарх албан ёсны аялан тоглолт хийхээр болсныг Netflix баталлаа.

Тус тоглолтыг “хоёр удаагийн Оскарын шагнал хүртсэн киноны ертөнц, уур амьсгалыг бодит тайзны шоу хэлбэрээр амилуулсан онцгой үзүүлбэр” хэмээн тодорхойлжээ.

Кинонд гардаг Huntr/x хамтлагийн дуунуудыг дуулсан уран бүтээлчид өмнө нь Brit Awards зэрэг томоохон арга хэмжээнд оролцож байсан ч энэ удаа бүрэн хэмжээний тайзны шоу эхлэх гэж байна.

Киноны “Golden” дуу нь YouTube дээр 1 тэрбум гаруй хандалт авч, асар их амжилт үзүүлсэн байна. Мөн кино нь KPop Demon Hunters бүх цаг үеийн хамгийн их үзэлттэй Netflix кино болж, 500 сая гаруй үзэлттэй болжээ.

Аялан тоглолтын хотууд болон хуваарь хараахан зарлагдаагүй байгаа ч энэ оны сүүлээр дэлгэрэнгүй мэдээлэл гарах аж.

Фенүүдийн дунд энэ шоуг бодит дуучид оролцох эсэх, эсвэл дүрүүдийг голограмм хэлбэрээр тайзнаа амилуулах эсэх талаар таамаг өрнөж байна.