Японд хүчтэй хар салхи дэгдэж, олон мужид нүүлгэн шилжүүлэлт зарлаж, нислэгүүд цуцлагджээ

Өнөө өглөө Японд “Жанми” нэртэй халуун орны хар салхи дайрч, хүчтэй салхи, аадар борооны улмаас тээвэр, бизнесийн үйл ажиллагаа доголдож, хэдэн арван мянган айл өрх цахилгаангүй болжээ.

Японы Цаг уурын агентлагийн мэдээлснээр хар салхины төв нь Хонсю арлын төвөөс зүүн хойд зүгт, Токиогийн бүс рүү чиглэн хөдөлж байгаа бөгөөд салхины хурд секундэд 25 метр хүртэл хүрч байна. Мөн Номхон далайн эрэг дагуух зарим бүс нутагт амь насанд аюултай гамшиг үүсэх эрсдэл өндөр байгааг анхааруулжээ.

Хар салхины улмаас одоогоор ойролцоогоор 60,000 өрхийн цахилгаан тасраад байгаа бөгөөд иргэдэд “Хэрэв ямар нэгэн аюул мэдрэгдвэл амиа хамгаалахын тулд эрт арга хэмжээ авахаас бүү эргэлзээрэй” гэж анхааруулга гаргажээ. 

Японы баруун өмнөд, төв болон зүүн хэсгийн найман мужийн хэдэн зуун мянган оршин суугчдад нүүлгэн шилжүүлэх сэрэмжлүүлэг хүргэгдсэн байна.

Агаарын тээврийн салбарт мөн томоохон саатал үүсэж, Japan Airlines болон All Nippon Airways зэрэг компаниуд нийтдээ 900 орчим дотоод болон олон улсын нислэгээ цуцалжээ.

Төмөр замын үйлчилгээ ч мөн адил доголдож, Кюүшю болон баруун бүсийн хурдны галт тэрэгнүүд хойшлогдсон бол Зүүн Японы төмөр зам Токио орчмын зарим чиглэлүүдийн үйлчилгээг түр зогсоосон байна. Цаашид бусад чиглэлүүд ч нөлөөлж болзошгүйг анхааруулжээ.

Аж үйлдвэрийн салбарт мөн нөлөө үзэж, Toyota Motor компани 13 үйлдвэрийнхээ үйл ажиллагааг түр зогсоожээ. 

Цаг уурын байгууллагууд нөхцөл байдал цаашид улам хүндрэх магадлалтайг анхааруулж, иргэдийг аюулгүй байдлаа хангаж, зааварчилгааг чанд мөрдөхийг зөвлөж байна.