Энхтайваны гүүрнээс унасан автомашины жолооч согтуу байсан нь тогтоогджээ

Өнөөдөр өглөө буюу 06 дугаар сарын 16-ны өдрийн 06:00 цагийн орчимд Хан-Уул дүүргийн 2 дугаар хороо, Энхтайваны гүүрэн дээрээс автомашин унасан гэх дуудлага мэдээлэл цагдаагийн байгууллагад бүртгэгджээ.

Шалгалтын явцад Toyota Alphard маркийн тээврийн хэрэгслийн жолооч согтууруулах ундаа хэрэглэсэн буюу 1.38 промиллийн согтолттой үедээ жолоо барьж явсан нь тогтоогдсон байна. Улмаар жолоодлогоо алдан гүүрнээс автомашинтайгаа унаж, гэмтжээ.

Хэргийг цагдаагийн байгууллага үргэлжлүүлэн шалгаж байгаа бөгөөд ослын нарийвчилсан шалтгаан, нөхцөлийг тогтоох ажиллагаа үргэлжилж байна.

Цагдаагийн байгууллагаас согтууруулах ундаа хэрэглэсэн үедээ тээврийн хэрэгсэл жолоодохгүй байхыг иргэдэд дахин анхаарууллаа.