Хууль бусаар худалдаалсан 189 сая төгрөгийн үнэ бүхий малын эмийг хураан авч, тусгай зөвшөөрлийг цуцалжээ

Өнөөдөр Мал эмнэлгийн ерөнхий газрын Мал эмнэлгийн улсын ахлах байцаагч Т.Тунгалаг хууль бус малын эмийн худалдаа, түүнтэй холбогдсон хяналт шалгалт,  талаар хэвлэлийнхэнд нээлттэй мэдээлж, зөвлөмж хүргэсэн.

Мэдээллийг тоймолбол, Мал, амьтны эрүүл мэндийн болон холбогдох хууль тогтоомжийн хэрэгжилтийг хангуулах зорилгоор Мал эмнэлгийн ерөнхий газраас хууль хяналтын байгууллага, Нийслэлийн Мал эмнэлгийн газартай хамтран 2026 оны 5 дугаар сарын 25-наас эхлэн нэг сарын хугацаанд малын эмийн хууль бус худалдаанд төлөвлөгөөт бус хяналт шалгалт хийсэн. Шалгалтад 24 аж ахуйн нэгж, 5 иргэн болон цахимаар малын эм сурталчилж, худалдаалж байсан 10 гаруй цахим хаягийг шалгасан бөгөөд шалгалтад хамрагдсан аж ахуйн нэгжийн 43.4 хувь нь хууль, стандартын шаардлага хангаагүйг онцоллоо.

Хяналт шалгалтаар импортлох тусгай зөвшөөрөлгүй, малын эмийн улсын бүртгэлд бүртгэгдээгүй, чанарын баталгаажуулалт хийгдээгүй, хадгалалтын болон шошгын зөрчилтэй, хугацаа нь дууссан малын эм, биобэлдмэл, тэжээлийн нэмэлт худалдаалсан зэрэг ноцтой зөрчлүүд илэрчээ.

Нийт 187 нэр төрлийн 12,545 ширхэг, 1,159 кг буюу 189.0 сая төгрөгийн үнэ бүхий малын эм, тэжээлийн нэмэлтийг хураан авч, 6 аж ахуйн нэгж, 3 иргэнд зөрчил шалган шийдвэрлэх ажиллагаа явуулж байгааг тэрбээр мэдээлэв.

Мөн хууль бусаар малын эм импортлон худалдаалсан, зөвшөөрөлгүй үйл ажиллагаа явуулсан этгээдийн үйл ажиллагаа эрхлэх тусгай зөвшөөрлийг Монгол Улсын Зөрчлийн тухай хуулийн дагуу Мал эмнэлгийн ерөнхий газрын даргын тушаалаар цуцалсан байна.

ЗӨВЛӨМЖ

Хяналт шалгалттай уялдуулан малчид, мал бүхий иргэд, хуулийн этгээдүүдэд мал эмнэлгийн ерөнхий газраас дараах анхааруулга, зөвлөмжийг хүргэж байна.

1. Мал, амьтны эм импортлох тусгай зөвшөөрөлгүй, малын эмийн улсын бүртгэлд

бүртгэгдээгүй, чанарын баталгаажуулалт хийлгээгүй малын эм, био бэлдмэлийг худалдан авахгүй байх;

2. Малын эм биобэлдмэл, ариутгал халдваргүйтгэлийн бэлдмэл, тэжээлийн нэмэлт,

оношлуурыг ховор, чухал, цорын ганц, маш өндөр идэвхитэй, үр дүн нь бусад эмээс илүү, аюулгүй, гаж нөлөөгүй, шинэ эм, патентлагдсан гэж хэрэглэгчийг төөрөгдүүлэх фэйсбүүкийн цахим хуудсаар хуулиар хориглосон хэлбэрээр малын эмийн зар сурталчилгаа явуулж буй иргэний гар дээрээс худалдан авалт хийхгүй байх;

3. Малын эм ханган нийлүүлэх байгууллага, малын эмийн сангууд нь үйл ажиллагаа

явуулах талаар мэргэжлийн байгууллагын дүгнэлттэй эсэх;

4. Хэт өндөр үнэтэй малын эм тариаг худалдан авахдаа эмийн чанарын баталгаатай

эсэх, гарал үүсэл, малын эмийн улсын бүртгэлд бүртгэгдсэн эсэхийг тодруулж байх;

5. Албан ёсны мал, амьтны эм импортлох тусгай зөвшөөрөл бүхий аж ахуй нэгжээр

дамжин нийлүүлэгдсэн эсэхийг магадлах;

6. Худалдаанд борлуулагдаж байгаа малын эм био бэлдмэлийн хүчинтэй хугацааг

нягтлах;

7. Малын эмчийн заавар зөвлөмж, үйлдвэрлэгчийн хэрэглэх зааврын дагуу хэрэглэх;
8. Эм, биобэлдмэл, ариутгал, халдваргүйтгэлийн бэлдмэл, эмийн түүхий эд, тэжээлийн

нэмэлтийн сав, баглаа боодол, хаяг шошго, тэмдэглэгээ хуульд заасан шаардлага хангасан эсэхийг нягталж хэрэглэх;

9. Хадгалалт, тээвэрлэлтийн горим хангаж худалдаалж буйд анхаарахыг зөвлөж байна.