Тэгш, сондгойгоор 50 мянган төгрөгт шатахуун олгох зохицуулалт энэ бямба гарагт хүчингүй болно

Ерөнхий сайдын захирамжаар байгуулагдсан шатахууны нийлүүлэлт, хангамжийг нэмэгдүүлэх шуурхай штабын ээлжит хурал болж, цаг үеийн нөхцөл байдал болон хэрэгжүүлж буй арга хэмжээний талаар АҮЭБЯ-ны Төрийн нарийн бичгийн дарга Б.Дашпүрэв мэдээлэл өглөө.

Өнгөрсөн 24 цагийн хугацаанд Улаанбаатар хотын 144 ШТС-д 1200 тонн АИ-92, орон нутгийн 82 ШТС-д 900 орчим тонн АИ-92 автобензин хүргэсэн байна. Энэ нь Монгол Улсын ердийн үеийн нэг өдрийн хэрэглээтэй тэнцэх хэмжээ аж.

Мөн ОХУ-аас Монгол Улсыг чиглэн 180 вагон буюу 11 мянган тонн АИ-92 шатахуун замд явж байгаа бөгөөд энэ амралтын өдрүүдэд Улаанбаатар хотод ирэхээр төлөвлөжээ.

Иймээс шатахууны хүртээмжийг нэмэгдүүлж, ШТС-уудад үүсэж буй ачааллыг бууруулах зорилгоор хэрэгжүүлж байсан зарим зохицуулалтыг наймдугаар сарын 15-ны өдрөөс зогсоохоор болсон байна.

Тодруулбал, Автомашины улсын дугаарын сүүлийн орноор тэгш, сондгойг ялган 50 мянган төгрөгийн хязгаарлалттайгаар шатахуун олгож байсан зохицуулалт энэ долоо хоногийн бямба гарагт буюу наймдугаар сарын 15-ны өдөр дуусгавар болох юм.

Түүнчлэн өнөөдөр орой гэхэд Улаанбаатар хотод 1200 тонн АИ-92 автобензин нэмж ирэх бөгөөд ШТС-уудад шуурхай хүргэх ажлыг зохион байгуулж байгаа аж.

Онгоцны түлшний буюу ТС-1-ийн хангамжийг нэмэгдүүлэх хүрээнд БНХАУ-аас 3000 тонн онгоцны түлш авах гэрээ байгуулж, эхний 1000 тонныг хүлээн аваад байна. Үлдсэн 2000 тонн түлш ойрын хугацаанд ирэхээр төлөвлөжээ. Мөн БНСУ-аас ЕВРО-5 стандартын шатахуун худалдан авах гэрээ байгуулсан байна.

Монгол Улс сард дунджаар 60-70 мянган тонн газрын тосны бүтээгдэхүүн хэрэглэдэг. Харин энэ наймдугаар сард ОХУ-аас 50 мянган тонн АИ-92, 15 мянган тонн АИ-95, нэмэлтээр 25 мянган тонн АИ-92 болон 5000 тонн ТС-1 шатахуун татан авахын зэрэгцээ БНХАУ, БНСУ-аас шатахуун авах гэрээ байгуулснаар газрын тосны бүтээгдэхүүний нөөцийг нэмэгдүүлэх боломж бүрдэж байгаа талаар шуурхай штабаас мэдээллээ.