Сэтгүүлч Н.Өнөрцэцэгт холбогдох хэргийг шүүх хурал өнөөдөр болно

Анхан шатны шүүхээс 4 жил 9 сарын хорих ял авсан сэтгүүлч Н.Өнөрцэцэгт холбогдох хэргийн давж заалдах шатны шүүх хурал өнөөдөр /2024.11.07/ 10:00 цагт болно.

Түүний шүүх хурлыг нээлттэй явуулах, цаашлаад шүүх хуралдаанд ажиглагчаар оролцох тухай хүсэлт, санал, шаардлагууд нэр бүхий Улсын Их хурлын гишүүд, Хүний эрхийн үндэсний комисс, Сэтгүүлчдийн нэгдсэн эвлэл зэрэг байгууллага болон нэр бүхий зарим иргэдээс удаа дараа гаргасан. Гэвч Нийслэлийн Эрүүгийн хэргийн давж заалдах шатны шүүхээс шүүх хурлыг нээлттэй явуулах боломжгүй гэж үзсэн юм. 

Тодруулбал, түүнд холбогдох хэргүүд “Маш нууц”-ын зэрэглэлд хамаарч байгаа учир бүхэлд нь хаалттай явуулах шаардлагатай хэмээн мэдэгдсэн. 

Шүүх хурлыг нээлттэй явуулахыг хүсэж, сэтгүүлч Н.Өнөрцэцэг хорих 461-р ангид өлсгөлөн зарлаад буй. Түүний биеийн байдлын талаар өмгөөлөгч Ц.Хишигжаргал "Сэтгүүлч Н.Өнөрцэцэгийн зүгээс шүүх хуралдааныг нээлттэй явуулахыг хүсэж, арваннэгдүгээр сарын 4-ний өглөөний 9:00 цагаас эхэлж өлсгөлөн зарласан. Түүнээс хойш 52 цагийн турш юу ч идээгүй байна.

Н.Өнөрцэцэг өлсгөлөн зарлахтайгаа зэрэгцэн хорих 461-р ангид хүсэлтээ өгсөн. Хүсэлтийн дагуу эмч нарын шинжилгээнд хамрагдсан юм. Шинжилгээгээр түүнийг бөөрний архаг дутагдалтай байгаа учир өлсгөлөн зарлавал биед нь маш эрсдэлтэй гэж дүгнээд, хүсэлтийг нь хүлээж аваагүй. Гэсэн ч Н.Өнөрцэцэг сайн дураараа юм идэхгүйгээр 52 гаруй цаг болсон байна. 

Н.Өнөрцэцэгтэй уулзаад гарч ирлээ. Түүний бөөр нь өвдсөн, хаван ихтэй, нойргүйдэлд орчихсон байна. Чийгтэй, хүйтэн, нарны шууд тусгалгүй өрөөнд юм идэхгүй байна гэдэг маш хүнд. Мөн уулзахад нэлээд тамирдсан нь харагдлаа. Дуу нь цаашаа орчихсон, хэцүүхэн ярьж байна. Гэсэн ч миний үйлчлүүлэгч өлсгөлөнгөө зогсоохгүй, үргэлжлүүлсээр байна гэдгээ илэрхийлсэн" хэмээн ярьсан билээ.