ЭЛЧИН САЙД Л.БОЛД ЖИЖИГ, ДУНД ҮЙЛДВЭРЛЭГЧДИЙН ТӨЛӨӨЛЛИЙГ ХҮЛЭЭН АВЧ УУЛЗЛАА

“МОНГОЛД ҮЙЛДВЭРЛЭВ -2024, ЕВРОПЫН ХОЛБООНД” арга хэмжээнд оролцогчдыг Монгол Улсаас Бельгийн хаант улсад суугаа Онц бөгөөд бүрэн эрхт Элчин сайд Л.Болд Брюссель хот дахь Элчин сайдын яамны байранд хүлээн авч, Бизнес уулзалт зохион байгууллаа.

Бизнес уулзалтыг нээж Элчин Сайд Л.Болд болон Европын Парламентын гишүүн асан н.Иштван Ехели нар хүрэлцэн ирсэн ЖДҮ эрхлэгчдэдээ амжилт хүсч үг хэллээ.

Арга хэмжээний хүрээнд ЖДҮ төлөөлөгчид Бельгийн ноос, нэхмэл, хувцас загвар, бусад салбарын жижиг, дунд үйлдвэрлэгчдийн төлөөлөгчидтэй харилцан мэдээлэл солилцож, туршлага хуваалцав.

Уулзалтаар Монголын талаас Монгол Улсын бараа, бүтээгдэхүүнийг Европын зах зээлд таниулах, хөрөнгө оруулагч татах, жижиг, дунд үйлдвэрлэгчдийн туршлага судлах боломжийн талаар харилцан санал солилцлоо.

Түүнчлэн, Монгол Улсын ЖДҮ эрхлэгчид БЕНЕЛЮКС дэх Монголын Бизнес консулын удирдлагуудтай уулзаж өөрсдийн бараа, бүтээгдэхүүнийг Европын зах зээлд гаргах, таниулах боломжуудын талаар харилцан ярилцаж, санал бодлоо солилцож, цаашид хамтран ажиллахаар тохиров.