Х.Булгантуяа: Төрийн нууц задруулсан албан тушаалтан ТАГНУУЛ дээр шалгагдаж байгаа гэж ойлгож байна

УИХ-ын дэд дарга Х.Булгантуяа сэтгүүлч Н.Өнөрцэцэгийн шүүх хурлын нөхцөл байдалтай танилцан, холбогдох хүмүүстэй нь уулзлаа. 

Тэрбээр "Хохирогч, өмгөөлөгч гээд найм, есөн хүн шүүх хуралд хамт орсон юм байна. Өөр УИХ-ын гишүүн ч байсан хуулийн дагуу шүүх хурал руу орох эрх байхгүй. Анхан шатны хэрэг хянан шийдвэрлэхээс эхлээд прокурорын яллах дүгнэлт анхнаасаа үйлдэхэд бүх хэргүүдийг нь нийлүүлээд нууцлах дүгнэлт гаргачихсан юм байна. Төрийн болон албаны нууцын тухай хуулиар хамгийн өндөр зэрэглэлтэй нууц нь "маш нууц" гэдэг зэрэглэлтэй учраас бүгдийг нь нууцлалд авах болчхоод байгаа юм байна. Өөрийнх нь найм, есөн өмгөөлөгч байгаа учраас эрхийг нь хамгаалахын тулд хууль зүйн зөвлөгөө үзүүлээд явж байгаа. 

Иргэдийн хамгийн гол асуугаад байгаа зүйл нь "энэ төрийн нууцын зэрэглэлтэй бичиг яагаад задарчхав" гэдэг байгаа. Төрийн юм уу, албаны тухай нууцыг ямар нэгэн нууцын бичигтэй харьцах ёстой хүний гараар дамжиж тэр бичиг очсон байж таараа гэж хүн болгонд ойлгогдож байгаа. Би ч гэсэн тэгж ойлгож байгаа. Түүнээс тэр бичиг хэн нэгэнд тийм амархан оччихно гэж байхгүй. Бидэнд ч тэр бичиг тийм амархан ирдэггүй. Бүгд тусдаа кодтой, хэнд тэр бичиг очсон бэ гэдгийг цаанаа бүртгэсэн байдаг. 

Нэг бол Тагнуулын байгууллагын дүгнэлтийг үндэслэн прокурор ажилласан байж таараа. Нууцтай холбоотой зүйл Тагнуулын байгууллагаас гардаг. Тэгэхээр тагнуулаас тухайн нууцтай холбоотой бичгийг задруулж, хэн нэгэн албан тушаалтанд хариуцуулсан байж таараа. Тэр хариуцуулсан албан тушаалтан задруулсан бол тагнуул дээр шалгагдаж байгаа гэж ойлгож байгаа" хэмээв.