БНЭУ-ын Батлан хамгаалахын штабын дарга, генерал Анил Чаухантай уулзалт хийв

БНЭУ-ын Батлан хамгаалахын штабын дарга, генерал Анил Чаухантай Монгол Улсаас БНЭУ-д суугаа Онц бөгөөд Бүрэн эрхт Элчин сайд Д.Ганболд болон Цэргийн атташей хурандаа О.Заяат нар 2024 оны гуравдугаар сарын 6-ны өдөр уулзалт хийлээ.

Уулзалтаар хоёр орны батлан хамгаалах салбар, зэвсэгт хүчний хамтын ажиллагааны талаар мэдээлэл солилцож, Монгол Улс Элчин сайдын яамны дэргэд цэргийн атташегийн албыг байгуулж, хоёр орны батлан хамгаалах салбарын хамтын ажиллагааг нэг шат ахиулж буй явдалд талархалтай байгаагаа илэрхийлээд эрхэм генералд “Хааны эрэлд” Энхийг дэмжих хамтын ажиллагааны олон улсын цэргийн сургуулийн урилгыг гардуулж өгөхийн хамт шинэ албан тушаалд томилогдож ирсэн цэргийн атташе хурандаа О.Заяатыг танилцуулсан байна.

Монгол Улс болон Энэтхэг Улс дипломат харилцаа тогтоогоод 69 жил болж байна. Мөн хоёр орны Батлан хамгаалах салбар хамтын ажиллагааг 2006 онд эхлүүлсэнээс хойш 18 жил болжээ. Энэ хугацаанд Монгол Улсын цэргийн алба хаагч нарыг сургах, бэлтгэхэд хамтран ажиллаж хоёр орны батлан хамгаалах хамтын ажиллагаа өргөжиж байгааг талууд илэрхийлсэн байна.

Хоёр орны хамтарсан бүс нутгийн аюулгүй байдлыг хангахад чиглэгдсэн "Нүүдэлчин заан" цэргийн хамтарсан сургууль жил бүр шинэ сэдэв, агуулгаар төлөвлөгдөн явагдаж, цэргийн алба хаагч нар маань хамтарсан бэлтгэл хийх, бие биенээсээ суралцах, туршлага хуваалцах, тусгай хүчний цэргийг хөгжүүлэхэд их чухал байгааг онцолжээ.

Ирэх онд хоёр улсын хооронд дипломат харилцаа тогтоосны 70 жилийн ой болно. Хоёр орны батлан хамгаалах салбар, зэвсэгт хүчний хэмжээнд явагдах аливаа үйл ажиллагааг 70 жилийн ойн арга хэмжээний хүрээнд холбож, зохион байгуулах нь зүйтэй гэдэгт санал нэгджээ.