Капитал банкны Б.Ундармаа НДС-ийн өр төлбөрт хураалгасан үл хөдлөхүүдээ буцаан худалдан авч эхэллээ

Капитал банканд хадгаламж хэлбэрээр байршиж байсан Нийгмийн даатгалын сангийн 104.2 тэрбум төгрөгөөс 2024 оны есдүгээр сарын 20-ны өдрийн байдлаар 11.88 тэрбум төгрөгийг мөнгөн хэлбэрээр, 25.02 тэрбум төгрөгийн 78 ширхэг үл хөдлөх хөрөнгийг хүлээн авснаар 36.89 тэрбум төгрөгийн төлбөр барагдсан гэж үзсэн байна.

Гэтэл Капитал банк Нийгмийн даатгалын сангийн өр төлбөрт үл хөдлөх өгсөн нэр зүүж, төр нь авсан нэр зүүн жүжиглэж байгааг баримтаар үзүүлье.

Баримт-1

Капитал банкнаас хурааж авсан үл хөдлөх хөрөнгүүдийг борлуулж, түрээсэлж эхэлжээ.

Тухайлбал, Булган аймгийн Булган сумын 5-р баг, Төв эмийн сангийн хоёр давхар 618 м.кв барилгыг “Булган эм хангамж” ХХК түрээсэлжээ. Түрээсийн гэрээг 2022 оны гуравдугаар сарын 24-ны өдөр байгуулж, нэг сарын төлбөрийг 3,708,000 төгрөг байхаар тохиролцсон байна. Гэтэл 2023 оны дөрөвдүгээр сарын 10-ны өдөр гэрээний үнийн дүнд өөрчлөлт оруулж, нэг сарын төлбөрийг 1,380,000 төгрөг болгожээ.

Баримт-2

Дорнод аймгийн Хэрлэн сум 7-р баг, Гаалийн газрын баруун талд байрлах барилгыг  “Монгол  эм импекс концерн” ХХК дуудлага худалдаагаар худалдан авчээ. Ингэхдээ дуудлага худалдаа нээсэн үнээс 1,000,000 төгрөгөөр илүү үнээр худалдаж авсан байна. Гэвч дуудлага худалдаа хууль журмын дагуу болсон гэдэг нь баримтаар нотлогдоогүй байна.

Баримт-3

Өвөрхангай аймаг дахь үл хөдлөх хөрөнгийг худалдан авах саналыг хоёр компаниас ирүүлжээ. Хамгийн өндөр үнэ санал болгосон “Монгол эм импекс концерн” ХХК дуудлага худалдаанд ялж 988.3 сая төгрөгөөр худалдаж авсан байна.

Баримт-4

Орхон аймгийн Баян-Өндөр сум 8 дугаар баг, Бүрэнбүст байрлах обьект, мөн Сэлэнгэ аймгийн Сүхбаатар сумын 3-р баг, Ховд аймгийн Жаргалант сум Магсаржав багт байрлах гурван обьектыг “Монгол эм импекс концерн” ХХК худалдан авах гэрээ байгуулжээ.

Дүгнэлт:

Булган аймгийн Булган суманд байрлах 618 м.кв барилгыг “Булган эм хангамж” ХХК 1.380.000 төгрөгөөр түрээсэлж байна. “Булган эм хангамж” ХХК-ийг судалвал хувьцаа эзэмшигч нь “Монгол эм импекс концерн” ХХК байна.  “Монгол эм импекс” ХХК-ийн хувьцаа эзэмшигч нь Батбаярын Болормаа, Бишрэлт групп. Хувьцаа эзэмшигч Батбаярын Болормаа нь УИХ-ын гишүүн асан, дампуурсан Капитал банкны босс Батбаярын Ундармаагийн төрсөн дүү.

Тэгэхээр УИХ-ын гишүүн асан Б.Ундармаа Нийгмийн даатгал болон Эрүүл мэндийн даатгалын сангийн өр төлбөрт хураалгасан үл хөдлөх хөрөнгүүдээ буцаан худалдан авч эхэллээ.

ҮРГЭЛЖЛЭЛ БИЙ...