МОНГОЛ УЛСААС КАНАД УЛСАД СУУГАА ОНЦ БӨГӨӨД БҮРЭН ЭРХТ ЭЛЧИН САЙД Э.САРАНТОГОСТОЙ АЛБАН УУЛЗАЛТ ХИЙВ

Жижиг, дунд үйлдвэрийн газрын дарга Я.Эрдэнэсайхан Монгол Улсаас Канад Улсад суугаа Онц бөгөөд Бүрэн эрхт Элчин сайд Э.Сарантогос, ЭСЯ-ны зөвлөх М.Батхуяг нартай цахимаар албан уулзалт хийлээ. Уулзалтад Экспорт олон улсын худалдааны төвийн гүйцэтгэх захирал Д.Оюунбилэг, ЖДҮГ-ын Бүртгэл, мэдээлэл, нэг цэгийн үйлчилгээний хэлтсийн дарга Б.Батболд болон албаны бусад хүмүүс байлцав.

“Монголын худалдаа, хөрөнгө оруулалт, өв соёлын өдрүүд 2024” арга хэмжээ АНУ-ын Нью-Иорк, Канад улсын Тронто хотод ирэх 10 дугаар сард болохтой холбогдуулан бэлтгэл ажлын явцын талаар талууд мэдээлэл солилцсон юм.

Энэ үеэр Элчин сайд Э.Сарантогос “Юуны өмнө та бүхний ажилд амжилт хүсье. Жижиг, дунд үйлдвэрийн газраас санаачлан БНСУ-д “Монголд үйлдвэрлэв” үзэсгэлэн худалдааг эхлүүлж, хамтран ажиллаж байсан нь саяхан. Арга хэмжээ улам өргөжиж байгаад баяртай байна. Энэ удаагийн Торонтод болох арга хэмжээнд ЭСЯ-ны зүгээс дэмжиж, хамтран ажиллах болно” гэв.

Арга хэмжээний хүрээнд зохион байгуулах олон улсын хөрөнгө оруулагчдын бизнес уулзалт, B2B, сургалт, семинар, хөрөнгө оруулагчдад оролцогчдын төсөл танилцуулах VIP уулзалтад ЭСЯамны зүгээс хамтарч ажиллахаа илэрхийлсэн юм.