Самбо бөхийн ДАШТ маргааш эхэлнэ

Самбо бөхийн насанд хүрэгчдийн дэлхийн аварга шалгаруулах тэмцээн маргааш /2024.11.08/ Казахстаны Астана хотод эхэлнэ.

Тус тэмцээнд манай улсаас 20 тамирчин оролцохоор Астанаг зорьжээ. Нийт 311 мянган ам.долларын шагналын сантай уг тэмцээн эрэгтэй, эмэгтэй тус бүр долоон жингийн ангиллаар өсөлдөх юм.

Улмаар түрүүлсэн бөх 4000, мөнгөн медаль хүртвэл 3000, хүрэл медаль хүртвэл 2000 ам.доллар хүртэх аж.

Самбо бөхийн ДАШТ анх 1973 онд Ираны Тегеран хотод зохиогджээ. Улмаар тус тэмцээнд МУГТ Ш.Чанрав самбо бөхийн анхны алтан медаль хүртэж байв. Энэ медаль нь бөхийн төрлүүдийн дэлхийн аварга шалгаруулах тэмцээний Монголын анхны алтан медаль гэдгээрээ онцлогтой билээ. Түүнээс хойш манай улсаас дэлхийн 42 алтан медальтан төрөн гарчээ.

Монголоос ДАШТ-ий хамгийн олон алтан медалийг гавьяат тамирчин Х.Эрдэнэт-Од эзэмшдэг аж. Тэрбээр дэлхийн дэвжээнд таван удаа түрүүлжээ. Түүний араас Г.Жамсран, Б.Бат-Эрдэнэ, О.Балжинням, Д.Сумъяа нар ДАШТ-ээс гурван удаа түрүүлж байв.

Дашрамд сонирхуулахад, манай улс 1974 онд самбо бөхийн ДАШТ, 1989 онд Дэлхийн цом, 1997, 2018 онд ААШТ-ийг эх орондоо зохион байгуулж байжээ.