М.Анхцэцэг: Өөрийгөө хайрлаж, гэр бүлдээ анхаарч амьдрахаар шийдлээ

"Алтан охин" хэмээн нэрлэгдэж, монголчуудын хайр хүндэтгэлийг хүлээсэн Монгол Улсын гавьяат тамирчин Мөнхжанцангийн Анхцэцэг хүндийг өргөлтийн спортоос зодог тайлж буйгаа мэдэгдлээ.

Тэрбээр энэ тухайгаа ярихдаа "Би 17 жил хүндийг өргөлтийн спортоор хичээллэж байгаа. Маш их цаг хугацаа, маш олон зүйлийг золиосолсон. Эрүүл мэндээ бодох цаг болсон байна. Надад одоо бэртэж үзээгүй, 100 хувь эрүүл нэг ч үе байхгүй. Тохой, өвдөг, мөр, шагай, нуруу гээд бүгд гэмтэж байсан. Би хүүхэд байхдаа аав, ээжтэйгээ нэг ч удаа зугаалгад явж байгаагүй. Одоо өөрийгөө хайрлаж, гэр бүлдээ анхаарч, нөхөртөө тусалж, гоё амьдарч үзмээр санагдаж байна. Тийм амьдрал илүү сайхан санагдах болсон. Өнгөрсөн хугацаанд өөрийнхөө хувьд харамсахааргүйгээр сайн хичээлээ" хэмээжээ.

М.Анхцэцэг аравхан настайгаасаа хүндийг өргөлтөөр хичээллэж, 17 жилийн турш тасралтгүй тив дэлхийн тэмцээн уралдаанд оролцон эх орныхоо төрийн далбааг мандуулсаар ирсэн. Тэрбээр багш Ц.Хосбаярынхаа хамтаар энэ олон жил тууштай хичээллэсний дүнд Монголын хүндийг өргөлтийн спортод үнэтэй хувь нэмэр оруулж, улсынхаа дээд амжилтыг 70 гаруй удаа шинэчлэн тогтоожээ.

М.Анхцэцэг өнгөрсөн хугацаанд гурван олимп, найман удаагийн Дэлхийн аварга шалгаруулах тэмцээнд оролцож, таван дэлхийн аваргаас долоон медаль хүртсэн.

Гэр бүлдээ зарцуулах гэргий, ээжийн үүргээ үл хайхран, эрүүл мэндээ золиосолж хүнд туухайтай 17 жил нөхөрлөсний эцэст тэр 27 насандаа ийн зодог тайлж байна.

Түүний гаргасан амжилтууд,

• 2014 он: Өсвөр үеийн Азийн АШТ-ий мөнгөн медаль
   
• 2014 он: Залуучуудын Азийн АШТ-ий хүрэл медаль
   
• 2015 он: “Дэлхийн цом”-ын тэмцээний хүрэл медаль
   
• 2016 он: Залуучуудын ДАШТ-ий алтан медаль (Монголоос анх удаа)
   
• 2016 он: Насанд хүрэгчдийн Азийн АШТ-ий алтан медаль (Монголоос анх удаа)
   
• 2016 он: “Рио-2016” олимпын наадам – Шагналт 8-р байр
   
• 2016 он: Залуучуудын Азийн АШТ-ий алтан медаль
   
• 2016 он: Оюутны ДАШТ-ий алтан медаль (Монголоос анх удаа)
   
• 2017 он: Залуучуудын Азийн АШТ-д хоёр дахиа түрүүлсэн
   
• 2017 он: Азийн танхимын болон тулааны спортын наадмын алтан медаль
   
• 2017 он: Насанд хүрэгчдийн ДАШТ-ий хүрэл медаль (Монголын анхны ДАШТ-ий медаль)
   
• 2019 он: Насанд хүрэгчдийн Азийн АШТ-ий мөнгөн медаль
   
• 2019 он: Насанд хүрэгчдийн ДАШТ-ий хүрэл медаль 
   
• 2019 он: “Дэлхийн цом”-ын тэмцээний алтан медаль
   
• 2020 он: “Токио-2020” олимпын наадам – Шагналт IV байр
   
• 2021 он: Насанд хүрэгчдийн ДАШТ-ий алтан медаль (Огцом, түлхэлттэй өргөлтөөр тус бүр мөнгөн медаль хүртэж, нийлбэр дүнгээр Дэлхийн аварга болсон)
   
• 2022 он: Насанд хүрэгчдийн ДАШТ-ий мөнгөн медаль
   
• 2024 он: Насанд хүрэгчдийн ДАШТ-ий мөнгөн медаль

Видео хэлбэрээр ЭНД дарж үзнэ үү.