Засгийн газрын өргөн барьсан хуулийн төсөл хамгийн ноцтой...

УИХ-ын гишүүн П.Сайнзориг нарын таван гишүүн “Монгол Улсад хөдөлмөр эрхлэх гадаад ажилтны тоо, хувь хэмжээ тогтоохгүй байх, гадаад ажилтны ажлын байрны төлбөрөөс чөлөөлөх тухай” хуулийн төслийг санаачлан УИХ-д өргөн барьсан. Хуулийн төслийг иргэд хүчтэй эсэргүүцэж, өнөөдөр жагсаал цуглаан хүртэл болов. Иргэдийн эсэргүүцэлтэй тулгарсан П.Сайнзориг нарын гишүүд хуулийн төслөө эгүүлэн татаж байгаагаа өнөөдөр (2024.12.23) мэдэгдсэн юм. 

Тэгвэл П.Сайнзориг нарын санаачилсан хуулийн төсөлтэй ижил төстэй, бүр илүү ноцтой хуулийн төслийг Засгийн газар буюу Гэр бүл, хөдөлмөр, нийгмийн хамгааллын яамнаас УИХ-д өргөн бариад байна. Засгийн газрын өргөн барьсан “Ажиллах хүчний шилжилт хөдөлгөөний тухай хуульд нэмэлт, өөрчлөлт оруулах тухай” хуулийн төслийн ноцтой заалтуудыг хүчин төгөлдөр мөрдөгдөж байгаа хуулийн заалтуудтай харьцуулж үзүүлье.

Өөрчлөлт-1
Хуулийн төсөл: “32.4.Засгийн газрын шугамаар авсан гадаадын хөнгөлөлттэй зээл, буцалтгүй тусламжийн хүрээнд ашигт малтмал, газрын тосны салбарт төсөл, хөтөлбөр хэрэгжүүлэхэд гадаад ажилтан ажиллуулах тохиолдолд Засгийн газар ажлын байрны төлбөрөөс хөнгөлж, чөлөөлж болно.”
Одоо мөрдөгдөж байгаа: 32.4.Засгийн газрын шугамаар авсан гадаадын хөнгөлөлттэй зээл, буцалтгүй тусламжийн хүрээнд төсөл, хөтөлбөр хэрэгжүүлэх болон стратегийн ач холбогдол бүхий дэд бүтэц, үйлдвэрлэл, шинэ хотын бүтээн байгуулалтад гадаад ажилтан ажиллуулах тохиолдолд Засгийн газар ажлын байрны төлбөрөөс хөнгөлж, чөлөөлж болно.

Өөрчлөлт-2
Хуулийн төсөл: “32.7.Эдийн засгийн өсөлт, бүтээн байгуулалт, салбарын бодлого, дотоодын ажиллах хүчний хомсдол зэргийг харгалзан ашигт малтмал, газрын тосны салбараас бусад салбарт ажиллах гадаад ажилтны ажлын байрны төлбөрийг Засгийн газар хөнгөлж, чөлөөлж болно”

Одоо мөрдөгдөж байгаа: 32.7.Ажил олгогч хөдөлмөр эрхлэх гадаад ажилтны тоо, хугацаагаар тооцож ажлын байрны төлбөрийг урьдчилан төлнө.

Дүгнэлт: ЗГ-аас хуулийн төсөл боловсруулахдаа хөдөлмөр эрхлэх гадаад ажилтны тоо, квотыг авч хаяжээ. Өөрөөр хэлбэл ашигт малтмал, газрын тосны салбараас бусад салбарт ажиллах гадаад иргэдийн тоо хязгаарыг тогтоохгүйгээр ажлын байрны төлбөрөөс хөнгөлөхөөр оруулж иржээ.