Төрийн нарийн тогтдоггүй Төрийн сайд Ч.Номин

Өмсөж зүүх, эдэлж хэрэглэх, идэж уухаасаа эхлээд жирийн иргэдтэй нэг зиндаад багтахгүй болтлоо задарч яваа нэг хүн байгаа нь Соёл, спорт, аялал жуулчлал, залуучуудын сайд Чинбатын Номин. “Ул”-ны амьдралаас улс төрд орж, Улаанбаатарын гэр хороололд өсөж үзээгүй цагаан гартнуудад таалагдах зүйл олон биш. Тэд үргэлж хүнийг дээрээс харж ирсэн бол иргэд тэднийг доороос харж ирсэн нь нуугаад байх зүйл бас биш юм. 

Ч.Номин Говь-Алтай аймгийн уугуул. Тухайн үед МАН-ын генсек, нутгийнх нь залуу Д.Амарбаясгалан түүнд итгэл үзүүлж Соёлын сайдаар 2021 оны нэгдүгээр сарын 29-ний өдөр томилуулсан байдаг. Намын анхан шатны байгууллагаар дамжилгүй тооноор орж ирэхэд намынхан нь түүнийг таатай хүлээж аваагүй ч амьдрал дунд “буцалж” сурна гэж найдаж байсан. Гэсэн ч тэр тэгсэнгүй. 

Гуравхан жилийн хугацаанд Төрийн нарийн бичгийн даргаараа С.Оюунбилэг, Ч.Энх-Амгалан, Ч.Цэвэгдорж нарын шилийг харж амжаад байгаа юм. Одоо Төрийн нарийн бичгийн даргын үүргийг түр орлон гүйцэтгэгч шинэ хүнтэй хамтарч ажиллаж чадах эсэх нь бас л эргэлзээтэй. 

Тэд төрийн албаны туршлага дутуугаас бус Ч.Номин сайдтай хамтарч ажиллаж чадахгүй гэх шалтгаанаар ажлаа өгсөн талаар салбарынхан нь шивэр авир гэлцдэг. Төрийн мэргэшсэн алба хаагч нар өмнөх ажлаа л сайн хийх нь чухал болохоос хэн нэгэн сайдын таалал, ааш аягт таацуулан ажиллана гэж байхгүй. Гэтэл Соёл, спорт, аялал жуулчлал, залуучуудын сайд Ч.Номингийн аалинд тааруулж ажиллах гэж яамныхан нь бүхэлдээ үйлээ үздэг гэнэ. 

Айлын эрх охин байж болно. Ажил, амьдрал мэдэхгүй ч байж болно. Ядаж ааш аягаа засаж төрийн ажлыг хиймээр юм даа, Ч.Номин сайдаа. Хүсэлд тань нийцүүлж, аашинд нь таацуулж ажиллах гэж яамныхан чинь үнэндээ зүдэрч байна шүү. 

Ашиг сонирхол нь хэтийдсэн хүний хувийн эрх ашгийг хангаж чадахгүй гэж хэлснийхээ төлөө Төрийн нарийн бичгийн дарга нар нь төрд ажиллаж чадахгүй явдаг байж мэдэх л юм. 

Р.ЖАРГАЛ