ШИЛЭН ДАНС: Ч.Номин сайдын Монгол телевиз 9 сая төгрөгөөр Эрүүл мэндийн яаманд нэвтрүүлэг бэлтгэж өгчээ

Эрүүл мэндийн яам Соёл, спорт, аялал жуулчлал, залуучуудын сайд Ч.Номингийн хамаарал бүхий Монгол телевизтэй 9 сая төгрөгийн гэрээ байгуулж, нэвтрүүлэг хийлгүүлжээ. 

Тодруулбал, Эрүүл мэндийн яамны шилэн дансны мэдээллийг харахад, 2024 оны арванхоёрдугаар сарын 13-нд "Монгол телевиз" ХХК-ийн Хас банкны 5000841637 тоот данс руу 9 сая төгрөг шилжүүлсэн байгаа юм. Ингэхдээ, тус телевизийн "Нүүдэл шийдэл" нэвтрүүлэгт тамхитай холбоотой хэлэлцүүлэг өрнүүлэхээр гэрээлжээ. 

Энэ дагуу Монгол телевизийн цахим хаягийг шүүхэд арванхоёрдугаар сарын 23-нд Нүүдэл шийдэл нэвтрүүлгээр "Ирээдүйгээ бүх төрлийн тамхидалтаас хамгаалцгаая" сэдвээр хэлэлцүүлэг өрнүүлсэн байна. 

Сануулахад, Соёл, спорт, аялал жуулчлал, залуучуудын сайд Ч.Номин 2011-2021 оны хооронд Монгол телевизийн захирлаар ажиллаж байв. Өдгөө тус телевизийн Ерөнхий захирлаар түүний нөхөр Г.Бат-Эрдэнэ ажиллаж буй юм.