УИХ-ын гишүүн Р.Сэддорж аймгийн Засаг дарга байхдаа “Тавантолгой түлш”-ээс “хумсалжээ”

Үндэсний аудитын газраас “Тавантолгой түлш” ХХК-ийн 2023 оны санхүүгийн тайланд аудит хийжээ. Уг аудитын тайлангаас онцлох ноцтой баримтуудыг цувралаар дэлгэж байна.

"Тавантолгой түлш" ХХК 2023 онд нийт 218 тэрбум 995 сая 200 мянган төгрөгийн алдагдалтай ажиллажээ. Үүнээс 68 тэрбум 789 сая төгрөгийн 13 зөрчлийг илрүүлсэн байгаа юм. 

Эдгээр аудитын зөрчлөөс анхаарал татах нь Өмнөговь аймгаас сонгогдсон УИХ-ын гишүүн Р.Сэддоржийн гар орсон байгаа явдал. Тэрбээр уг компаниас 65 сая төгрөгийг "хумсалсан" байна. 

Тодруулбал, тайланд “Өмнөговь аймгийн засаг даргатай хамтран ажиллах гэрээ байгуулж, сумдад өвс хүргэх тээврийн зардалд 65.0 сая төгрөгийг зарцуулж, дуусаагүй үйлдвэрлэлийн дансанд бүртгэсэн байна” хэмээн дурдсан байна. Улмаар зөрчлийг арилгуулах албан шаардлага хүргүүлжээ.

Сануулахад, Өмнөговь аймгийн Засаг даргаар Р.Сэддорж 2020-2024 оны хооронд ажиллаж байсан билээ. Тэрбээр УИХ-ын 2024 оны сонгуульд аймагтаа нэр дэвшин ялалт байгуулж, өдгөө УИХ-ын гишүүн, Эдийн засгийн байнгын хорооны даргын албыг хашиж буй. Өнгөрсөн жил нүүрсний хулгайн сонсгол явагдах үеэр тэр гэрчээр дуудагдаж, хулгайн асуудалд нэр холбогдож байв.