Нийслэлд тараах 32 мянган зуухыг "Экоресурс" ХХК ₮27.3 тэрбумаар нийлүүлэхээр болжээ

Нийслэлийн дарга Х.Нямбаатар агаарын бохирдлыг бууруулахын тулд утаагүй зуух тараахаа мэдэгдсэн билээ.

Тодрууулбал, тэрбээр "Агаарын бохирдолтой бусад орнуудын адил бид сайжруулсан шахмал түлш түлж шилжилтийн үеэ туулж яваа. Түүхий нүүрс түлдэг байх үед нүүрсний үнэр, агаарын бохирдлын хэмжээ илүү байсан гэдгийг мэргэжлийн байгууллага хэлж байна. Сүүлийн үед гарч гарч буй угаарын хордлогын тохиолдлын дийлэнх нь чанарын шаардлага хангахгүй зуухнаас болсон. Айл өрхүүд зуухаа шинэчлэх үүрэгтэй. Харамсалтай нь 84,000 айлын зуухыг шинэчлэхгүй бол болохгүй байна. Эхний ээлжинд 32 мянган айлын стандартын шаардлага хангахгүй байгаа зуухыг шинэчилнэ." хэмээн хэлсэн. 

Тэгвэл Нийслэлийн худалдан авах ажиллагааны газраас "Агаар, орчны бохирдлыг бууруулах хөтөлбөрийн хүрээнд гэр хорооллын дахин төлөвлөлтөд ороогүй айл өрхүүдийн эрчим хүчний зохистой хэрэглээг дэмжих төслийн хүрээнд стандартад нийцсэн ахуйн зуух худалдан авах ажил" нэртэй  тендер зарлажээ. Ингэхдээ 28.2 тэрбум төгрөгийн төсөвт өртөгтэйгөөр зарласан байна. Улмаар үүнд "Экоресурс" ХХК 27 тэрбум 360 сая төгрөгийн үнийн санал ирүүлж, шалгарсан байна. 

"Экоресурс" ХХК-ийн эцсийн өмчлөгчөөр П.Баярцог, Ц.Мөнхбаатар нар бүртгэлтэй байгаа юм. Тус комипани нь 2014 оноос эхлэн үйл ажиллагаагаа эхэлжээ. Хожим 2023 оноос зуухны худалдаа, үйлдвэрлэлийн чиглэлээр бүртгүүлж, агаарын бохирдлыг бууруулах чиглэлийн хэд хэдэн тендерт шалгарч байжээ. 

Тухайлбал, 2024 оны долдугаар сарын 23-нд Нийслэлийн худалдан авах ажиллагааны газраас зарласан агаарын бохирдлыг бууруулах тоног төхөөрөмжийн 2 тэрбум төгрөгийн төсөвт  өртөгтэй тендерт шалгарчээ. Мөн 2023 оны долдугаар сард Өмнөговь аймагт 2.6 тэрбум төгрөгөөр утаагүй зуух нийлүүлж байсан аж.