Н.Учрал: Төрийн өмчит компаниуд алдагдалтай ажилласан хэр нь үр дүнгийн урамшууллыг удирдлагууддаа олгосон байна

Засгийн газрын хуралдаанаас гарсан шийдвэрийг өнөөдөр олон нийтэд танилцууллаа. Энэ үеэр ЗГХЭГ-ын дарга Н.Учрал төрийн өмчит хуулийн этгээд, комданиудад тавих хяналт, реформын талаар мэдээллээ. 

Тэрбээр,  "Төрийн өмчийн компани, Орон нутгийн өмчит компаниуд зайлшгүй реформ хийх шаардлагатай болсон байна. Зарлага өндөр, зарлагаараа захирлууд нь урамшуулал авдаг, төсвөөс гадна хяналтгүй төсөвтэй төрийн өмчит компаниудад зохих арга хэмжээг авах ёстой.Монгол Улсад нийт Төрийн өмчийн хоронд тайлан ирүүлдэг 99 компани байгаа. Үүн дээр охин, хараат компанийг нэмбэл нийт 122 орчим төрийн өмчит компани байгаа юм.  Мөн орон нутгийн өмчит компанийг бол бараг тоолж барахгүй хэмжээнд хүрсэн.

 

Нийт төрийн өмчит компаниуд улсын төсөвтэй харьцуулахад 75 хувийн зарлага гаргаж байна. Төрийн өмчит компаниудын гаргаж байгаа зарлага нь бусад орлого олж байгаа газруудын тоо хэмжээтэй адилхан түвшинд ирчихсэн байна. Төрийн өмчит хуулийн этгээдийн ашгийн тухайд зөвхөн таван компани л цэвэр ашигтай ажиллаж, бусад 51 компани нийлээд дөнгөж 380 тэрбум төгрөгийн ашиг олдог. Харин 43 хуулийн этгээд -150тэрбум төгрөгийн алдагдалтай ажиллаж байна. Үүнээс дүгнэхэд хөрөнгө оруулалтын төлөвлөгөөнд тусгагдаагүй 158 арга хэмжээг 319.8 тэрбум төгрөгөөр зохион байгуулж, зарцуулсан байна. Огт төлөвлөөгүй зардал гаргасан гэсэн үг.

 

Нэг жилийн хугацаанд 9 төрийн өмчит компани 971.9 сая төгрөгийн үр дүнгийн урамшууллыг удирдлагууддаа олгосон байна. Ингээд алдагдалтай ажилладаг, дээрээс нь үр дүнгийн урамшуулал авдаг нь хууль эрх зүйн хүрээнд ажиллах тал дээр хяналт сул байгаа нь ажиглагдаж байна. Төрийн өмчит компани хэрэв ашигтай ажиллаж байвал түүнийг нь бүтэц зохион байгуулалт, гүйцэтгэлтэй нь уялдуулна. Нийгмийн хариуцлагын төсөл хөтөлбөрийн санхүүжилтийг тухайн компанийн алдагдалтай, алдагдалгүй ажиллаж байгаагаас хамаарч олгохгүй бол алдагдалтай ажиллаж байгаа хэр нь нийгмийн хариуцлагын санхүүжилт авдаг, үр дүнгийн урамшуулал авдаг байдал газар аваад байна. Энэ мэт олон асуудалд хяналт тавьж, бүх шатны төрийн өмчт компанид шилэн ажиллагаа явуулж ил тод болгоно" гэлээ.

 

Ийнхүү Засгийн газрын өнөөдрийн хуралдаанд  төрийн өмчит газруудын эрх зүйн байдлын реформын тухай танилцуулгыг хийсэн байна. Ирэх долоо хоногт төрийн өмчийн компанийн хуулийг  Засгийн газарт танилцуулахаар бэлтгэж улмаар УИХ-д өргөн мэдүүлэх аж.