Ж.Чинбүрэн: 461-р ангид хоригдож байгаа П.Батчулуун эмчийн бие муудсан тул эмнэлэгт хүргүүлсэн

УИХ-ын гишүүн Ж.Чинбүрэн Цагдан хорих 461-р ангид ял эдэлж буй П.Батчулуун эмчтэй биечлэн уулзжээ.Түүний биеийн байдал сайнгүй байгаагаас үүдэн Гуравдугаар төв эмнэлэгт хүргэгдсэн байна. 

Тодруулбал, энэ талаар УИХ-ын гишүүн Ж.Чинбүрэн өөрийн цахим хуудастаа,

"Цагдан хорих 461-р ангид П.Батчулуун эмчтэйгээ очиж уулзлаа. Үүссэн нөхцөл байдлыг өөртэй нь тодорхой сайн ярилцсан. Харин биеийн байдал нь сайнгүй байгаагийн улмаас  Улсын гуравдугаар төв эмнэлэгт хүргэгдлээ. Зүрхэндээ долоон стэндтэй хүний эрүүл мэндэд үүсэж болох хүндрэлээс сэргийлэх нэн шаардлагатай юм. Цаашид П.Батчулуун эмчид миний зүгээс шаардлагатай бүх нөхцөлд дэмжиж тусалж ажиллах болно оо. Бидний эмч нар, бусдын эрүүл мэнд амь насыг авран хамгаалах явцдаа хохирогч болох ёсгүй юм. Цаашид Донорын тухай хууль, Эрүүл мэндийн тухай хуульд өөрчлөлт оруулах, Эмч эмнэлгийн мэргэжилтний эрх зүйн байдлын тухай хуулийг яаралтай Улсын Их Хуралд өргөн барьж ажиллана.  УИХ-ын гишүүн, Хүний эрхийн дэд хорооны дарга Сүхбаатарын Эрдэнэболд танд эмчийн ажлыг ойлгож, хүний эрхийг дээдлэн, ханган ажиллаж байгаад маш их баярлалаа. П.Батчулуун эмчийгээ ойлгож, хайрлан хамгаалж буй салбарынхан та нараараа маш их бахархаж байна, баярлалаа" хэмээн нийтэлжээ.