Ц.Дуламсүрэн: Галзуурах шахам допинг тарьсан эрлийз морьдыг хүүхдээр унуулах гээд улайраад байх юм

Тод манлай уяач Ц.Дуламсүрэн өнөөдөр (2025.01.30) хаврын морин уралдааны талаар өөрийн байр сууриа илэрхийллээ.

Тэрбээр, 

"Хаврын морин уралдаан бол бидний өв соёл биш шүү. Монголд хаврын уралдаан хийхгүй байлаа гээд Өвөр монголд өв соёл оо алдчих гээд байгаа юм ерөөсөө биш. Тэр гаднын улсууд юугаар яаж уралдах нь тэдний эрх. Манайх үндэсний баяр наадмаараа нас насныхаа морьдыг тохирсон зайд нь уралдуулдаг уламжлалтай. Эртнээс тогтсон зүйл буюу эв санааны нэгдлийн наадам болдог. Гэтэл гуравдугаар сард газар гэсдэг юм уу. Морь нь хөрсөө ч мэдэрч чадахгүй ийм хүйтэнд галзуурах шахам допинг тарьсан эрлийз морьдыг хүүхдээр унуулдаг байдал нь хүүхдийн эрхийг зөрчиж байгаа юм. 50-60 км цагийн хурдтай морийг та нар ч унаж чадахгүй. 

Гурван сая төгрөг төлөөд 300 саяын бай шагналын төлөө уралдах гэж улайрч байна. Баасанжаргал гишүүн өөрийн биеэр энэ асуудлыг судлаад, Өлзийтөд айлд очоод хүүхдүүдтэй уулзаж тэмдэглээд гаргасан асуудал. Зөв зүйл ярьсан эмэгтэй хүнийг, эх хүнийг элдвээр хэлж доромжилдог хүн уяач мөн юм уу. Жудагтай эр хүн мөн юм уу.

Монгол морио уяж уралддаг, уламжлалаа хүндэтгэн малаа маллаж яваа хөдөөгийн уяачдын нэрийг барьж жагсаал цуглаан хийж улс төрд нөлөөлж байгаа нь зүй зохистой зүйл биш. Эрлийз морь уралдуулах сонирхолтой хүмүүс тэжээлийн морины баасаар Сүхбаатарын талбайг дүүргэж, найрлаад явснаас гурав хоногийн дараа Засгийн газар хууль зөрчин, хаврын морин уралдаан хийх эрхийг орон нутагт өгчихлөө. Дэлхийн хүүхдийн эрхийг хамгаалах гэрээ хэлцэлд манай улс нэгдсэн хэр нь түүнийг нь аймгийн засаг дарга нь шийдэж, зөрчиж болдог юм уу. Ашгийн төлөө юм уу өв соёлын уралдаан юм уу гэдгийг хянах хэрэгтэй" гэлээ.