Ерөнхий сайд Л.Оюун-Эрдэнэ Ч.Номин сайд руу ноцжээ

   Монгол Улсын 2025 оны төсвийг парламент хэлэлцэж байна. Засгийн газар төсвөө багцалж оруулж ирсэн ч ард түмэн таалахгүй зүйлс төсөв дотор нуугдсан байгаа юм. Тухайлбал, Соёлын сайд Ч.Номин 18.3 тэрбум төгрөгийн ваучер гаргаж хүүхдүүдэд кино үзүүлнэ хэмээн мэдэгдсэн нь төсвийн гал дээр тос нэмсэн.

     Улаанбаатар хот нь хэзээ мөдгүй тоггүй болж хотоороо харанхуй нүүрлэх, халаалт дулаан тасалдаж хотороо хөлдөх эрсдэлтэй байхад 18.3 тэрбумаар хүүхдүүдэд кино үзүүлнэ гэдэг амьдрал мэдэхгүй сайдын амнаас гарсан үг араас нь яаж ч элдээд гүйцэхээргүй өндрийг авсан. Хувьдаа телевизтэй, хувьдаа контент бүтээдэг сайдыг улсын төсвийн мөнгөөр өөрийн эзэмшлийн телевизээ угжих нь гэдэг хардлага гаарав. Улсын төсвийн мөнгөө хуугаар нь хамуулж, хоосон хоцорч ирсэн иргэд хардахгүй гээд яахав.

2025 оны улсын төсвийг Ч.Номин сайдын “Тэрэлж” зочид буудалд 50 сая төгрөгөөр хэлэлцсэн гэх асуудал гаран намжаагүй байхад 18.3 тэрбумын киноны ваучер нэмэгдсэн нь Ерөнхий сайд Л.Оюун-Эрдэнийн уурыг хүргэжээ. 18.3 тэрбумыг Ч.Номин сайд зарцуулахын тулд өөрийн “Тэрэлж” зочид буудалдаа 50 сая төгрөгөөр хэлэлцсэн болж таарч байна. Тиймээс Ерөнхий сайд Л.Оюун-Эрдэнэ Соёлын сайд Ч.Номинг өрөөндөө дуудаж банга хүртээж, баахан загнасан талаар улс төрийн хүрээнд ярьж байна. Төсөвт суулгасан мөнгөө зөв ойлгомжтой тайлбарлаж чадсангүй хэмээн ихэд уурссан гэх. Үе үе Ч.Номин сайдтай холбоотой таагүй мэдээлэл гарч байгаа. Сайд болсноосоо хойш улсын төсвийн 300 гаруй сая төгрөгөөр гадаад улсад ажиллах тийз захиалсан гэхчилэн мордохын хазгай болсон бүгдийг нь Ерөнхий сайд түүнд хэлээд баахан банга хүртээсэн гэх юм.

       Ч.Номингоос яаж салах уу гэдэг яриа хүртэл гарсан талаар Төрийн ордонд бор шувуу нисэж эхэлжээ.

Р.ЖАРГАЛ