66 тэрбум төгрөгийг баялаг бүтээгчдэд олгохоор улсын төсөвт суулгажээ

Төр, хувийн хэвшлийн үүрэг хариуцлага, ажлын уялдаа холбоог сайжруулах зорилгоор “Цагаан алт” үндэсний хөдөлгөөн-Төр, хувийн хэвшлийн зөвлөлдөх уулзалтыг өнөөдөр /2025.02.20/ Төрийн ордонд зохион байгуулж байна.

Цаашид “Цагаан алт” хөдөлгөөн амжилттай хэрэгжих нь дан ганц ХХААХҮЯ-ны үүрэг хариуцлага биш бөгөөд харин төрийн бүх байгууллагуудын ажлын уялдаа холбоо, үүрэг хариуцлага, ААН-үүдийн хамтын ажиллагаа харилцан ойлголцол гэдгийг төрийн тэргүүн онцгойлон санууллаа.

"Цагаан алт" хөдөлгөөнийг амжилттай хэрэгжүүлэх зорилгоор салбарын ААН, баялаг бүтээгчид, эрдэмтэн судлаач нар санаачилга гарган “Цагаан алт” ТББ болон эрдэмтдийн зөвлөлийг байгуулан ажиллаж байгаа аж.

Ерөнхийлөгч У.Хүрэлсүх:

-“Удахгүй сар шинийн баяр болно. Манай ард түмэн үндэсний үйлдвэрлэлийнхээ бүтээгдэхүүнийг худалдан авч байх хэрэгтэй. Энэ бол эх оронч үзэл. Ингэвэл манай үндэсний үйлдвэрлэл сэргэнэ. Манай ард түмэн үндэсний үйлдвэрлэлдээ маш том хөрөнгө оруулалт оруулна.

"Цагаан алт" үндэсний хөдөлгөөний зорилго бол ноос, ноолуур, арьс, ширний боловсруулалтын түвшнийг дөрвөн жилийн хугацаанд хоёр дахин өсгөж, үйлдвэрлэл экспортыг 2-3 дахин нэмэгдүүлж нийтдээ 8000 гаруй ажлын байрыг шинээр бий болгох явдал юм. Энэ зорилгод хүрэхийн тулд ноос, ноолуур, арьс, ширний салбарын ААН, баялаг бүтээгчид нийтдээ 2.2 их наяд төгрөгийн өртөгтэй татвар, гаалийн хөнгөлөлт, чөлөөлөлт, бага хүүтэй, урт хугацаатай санхүүжилтээс эхлээд нийт 27 арга хэмжээг хэрэгжүүлэхээр УИХ-ын тогтоолд тусгаж, төрийн 12 байгууллага хамтран ажиллахаар болсон. Өнөөдөр энэ байгууллагуудын төлөөлөл сууж байна. Та бүхэн хэрхэн хамтран ажиллах талаараа ярих болно. Энэ бол мал аж ахуйн салбарт сүүлийн 30 жил байгаагүй төрийн дэмжлэг гэж ойлгож болно" хэмээв. 

2025 он гэхэд 800 орчим тэрбум төгрөгийн хөнгөлөлттэй зээлийг арилжааны 10 банкаар дамжуулан баялаг бүтээгчдэд олгохоор төлөвлөсөн бөгөөд уг зээлийн хүүгийн хөнгөлөлтөд зориулан 66 тэрбум төгрөгийг улсын төсөвт суулгасан байна.

Шаардлага хангасан ААН-үүдэд банкууд зээл олгож эхэлсэн бөгөөд өнгөрсөн нэг сар хүрэхгүй хугацаанд 90 орчим тэрбум орчим төгрөгийн зээлийг ноос, ноолуур, арьс ширний зургаан ААН, баялаг бүтээгчдэд олгохоор болжээ.