Хөндөх сэдэв: Хэрээс хэтэрсэн мөрийтэй тоглоомд хяналт тавих цаг нь болжээ

Өчигдөр /2025.03.06/ Засгийн газрын хуралдаанаас гарсан шийдвэрийн талаар ЗГХЭГ-ын дарга Н.Учрал цахим мөрийтэй тоглоомыг тоглож, зохион байгуулж, сурталчилж байгаа бүх үйлдэлд эрүүгийн хариуцлагыг чангатгах талаар мэдэгдсэн.

Өөрөөр хэлбэл, Зөвшөөрлийн хуулиар цахим мөрийтэй тоглоомыг бүрэн хориглож байна гэсэн үг.

Үүнээс ч өөр аргагүй биз. Цахим мөрийтэй тоглоомд тархиа угаалгаж хамаг хөрөнгөө алдчихаад цагдаагийн хаалга татаж гомдол мэдүүлдэг хүмүүсийг өөр яах ч билээ. Сүүлдээ бараг айл бүр нэг мөрийтэй тоглоомчин, казиночин, бэтчинтэй болжээ. 

Хэдэн жил хөлс хүчээ шавхан цуглуулсан мөнгө, эд хөрөнгөө хэдхэн хоногт алдана гэдэг үнэхээр гол харлам зүйл. "Мөнгө цагаан нүд улаан" гэгчээр амар хялбар аргаар их мөнгөний араас шунах тусам эргээд өөрөө эрсдэлд орох нь элбэг. Манай улсад энэ байдал газар авч байгаа учраас нэн даруй хуульчлахаар шийдсэн бололтой. 

Тодруулбал:

-Иргэн, аж ахуйн нэгж, influencer, youtuber-үүд, ТВ, Фм радио, Youtube, Facebook, Instagram, Tik tok гэх мэт олон нийтийн сувгаар 1xbet, Melbet болон бусад цахим мөрийтэй тоглоомыг сурталчилсан тохиолдолд эрүүгийн хариуцлага хүлээнэ. 

Мөн спортын багийн өмсгөл, зураг, рекламд 1xbet, Melbet болон бусад цахим мөрийтэй тоглоомыг сурталчилсан тохиолдолд эрүүгийн хариуцлага хүлээх аж.

1XBET болон бусад цахим мөрийтэй тоглоомоос болж хохирсон бодит жишээнүүд:

1. Өрөнд орж, амьдралаа сүйрүүлсэн Монгол залуу

Нэгэн залуу анх 1XBET дээр бага хэмжээний мөнгөөр бооцоо тавьж эхэлсэн ч, хожсон үедээ баярлаж, алдах үедээ алдсанаа нөхөх гэж улам их мөнгө зарцуулдаг болжээ. Ингээд цалин, хадгаламжаа үрж дуусгаад, зээл авч мөрий тавьсаар 100 сая гаруй төгрөгийн өрөнд орж, улмаар байр, машин, гэр бүлийнхээ итгэлийг алдсан байна.

2. Амиа хорлолтод хүргэсэн мөрийтэй тоглоом

2023 онд ОХУ-д нэгэн оюутан 1XBET болон бусад онлайн мөрийтэй тоглоомд донтохын улмаас 10,000 ам.долларын өрөнд орж, эцэст нь сэтгэл санааны гүн хямралд орж амиа хорлосон харамсалтай хэрэг гарчээ.

3. Европт цахим мөрийтэй тоглоомд хүүхдүүдийг татан оролцуулсан жишээ

Англи улсад нэгэн 14 настай хүү эцэг эхийнхээ банкны картаар онлайн мөрийтэй тоглоомд 3,000 фунт стерлинг (бараг 13 сая төгрөг) алдсан хэрэг гарсан. Энэ нь мөрийтэй тоглоомын платформууд насны хязгаарлалтгүй, хяналтгүй байгаатай холбоотой гэдгийг илчилсэн.

1xbet, Melbet зэрэг бусад цахим мөрийтэй тоглоомын платформ татаж ашигладаг байдлыг Apple, Google, Meta компанитай хамтран зогсоох аж. Мөн VPN ашиглан тоглосон, тоглуулсан, AGENT зуучилсан тохиолдолд эрүүгийн хариуцлага хүлээнэ.

Цахим мөрийтэй тоглоомыг сурталчлахыг хориглосон жишээ:

1. ОХУ: 1XBET-ийг албан ёсоор хааж, сурталчилгаа явуулсан хүмүүсийг шийтгэсэн.
Оросын эрх баригчид 1XBET-ийг хууль бус үйл ажиллагаа явуулсан хэмээн 2022 онд албан ёсоор хориглож, уг платформыг сурталчилсан олон нийтийн сүлжээний нөлөөлөгчдийг их хэмжээний торгууль, зарим тохиолдолд эрүүгийн хариуцлагад татсан.
2. Франц: Цахим мөрийтэй тоглоомын сурталчилгаанд хязгаарлалт тогтоосон
Францын Засгийн газар цахим мөрийтэй тоглоомын сурталчилгааг телевиз, радио, олон нийтийн сүлжээгээр явуулахыг эрс багасгаж, зөвхөн тодорхой насны хүмүүсийн хандаж болох платформуудад зөвшөөрдөг болсон.
3. БНХАУ: Онлайн мөрийтэй тоглоомыг бүрэн хориглосон
Хятад улс цахим мөрийтэй тоглоомыг бүрэн хориглож, VPN ашиглан тоглож буй хүмүүсийг ч илрүүлж, хатуу хариуцлага хүлээлгэдэг. Tencent зэрэг томоохон технологийн компаниудыг мөрийтэй тоглоомын платформуудтай хамтрахыг бүрэн хориглосон байна.

Манай улсын хувьд зөвхөн 1XBET гэхэд жилдээ нэг сая доллароор спортын баг, дуучид, influencer, youtuber-үүдийг ивээн тэтгэж 500 сая долларын ашиг олдог гэсэн тооцоо бий.

Энэ 500 сая доллар бол Монгол залуусын ажил, амьдрал, үр хүүхэд, хайртай бүхнээсээ хагацан байж өгсөн мөнгө. 

Тийм учраас Монгол Улсын Засгийн газраас 1XBET, MELBET гэх мэт төрөл бүрийн цахим мөрийтэй тоглоомыг тоглосон, зохион байгуулсан, зуучилсан, сурталчилсан бүх үйлдэлд эрүүгийн хариуцлага хүлээлгэх хуулийг нэн яаралтай горимоор УИХ-д өргөн мэдүүлэхээр шийдвэрлэсэн нь энэ аж.