ШИЛЭН ДАНС: Нийслэлийн Агаар, орчны бохирдолтой тэмцэх газар ₮2,2 тэрбумаар тоног төхөөрөмж авчээ

Нийслэлийн Агаар, орчны бохирдолтой тэмцэх газар өнгөрөгч хоёрдугаар сард 2,2 тэрбум төгрөгөөр тоног төхөөрөмж авчээ. 

Тодруулбал, Шилэн дансны мэдээллээс харахад Нийслэлийн Агаар, орчны бохирдолтой тэмцэх газар хоёрдугаар сарын 28-нд 2 тэрбум 295 сая төгрөгийн зарлага гаргаж, "Интеллгент технологи" ХХК-ийн данс руу шилжүүлсэн байна. Ингэхдээ тоног төхөөрөмж гэх нэрээр хийсэн байгаа юм.

"Интеллгент технологи" компанийг судалж үзвэл, 2018 онд үүсгэн байгуулагджээ. Баттуяагийн Намуун, Дамбын Рагчаахүү нар хувьцаа эзэмшдэг. Гүйцэтгэх захирлаар нь Өлзийбаярын Золзаяа, эцсийн өмчлөгчөөр нь Дамбын Рагчаахүү бүртгэлтэй байна. 

Тус компани өмнө нь,

-2021 онд "Тавантолгой Түлш" компаниас зарласан 2 тэрбум 900 сая төгрөгийн угаарын хийн хянах төхөөрөмж худалдан авах тендер,

-2022 онд Байгаль орчин, аялал жуулчлалын яамнаас зарласан 2 тэрбум 188 сая төгрөгийн төсөвт өртөгтэй айлуудад угаарын хий мэдрэгч, мэдээлэл дамжуулагч төхөөрөмж суурилуулах тендер,

-2022 онд Нийслэлээс зарласан Онцгой байдлын үед шаардлагатай тоног төхөөрөмж, багаж хэрэгсэл нийлүүлэх 300 сая төгрөгийн тендер зэрэгт шалгарч байжээ. 

Мөн сүүлд 2024 онын есдүгээр сард 1,3 тэрбум төгрөгийн төсөвт өртөгтэй Агаарын чанарыг сайжруулах бүсийн гэр хорооллын айл өрхүүдэд алсын зайн дамжуулагчтай угаарын хий мэдрэгч суурилуулах тендерт шалгарсан байна.