"Шалгагдаж байгаа этгээдийн зургаан дансаар нийтдээ 9.3 тэрбум төгрөгийн цахим мөрийтэй тоглоомын гүйлгээ дамжсан"

Өнөөдөр /2025.03.19/ Засгийн газрын хуралдаанаас гаргасан шийдвэрийг танилцуулах үеэр ХЗДХ-ийн сайд О.Алтангэрэл Ноорог.мн сайттай холбоотой асуудлаар мэдээлэл өглөө.

Тэрбээр "Шалгагдаж байгаа нэр бүхий хүмүүс дотор 2024 оны есдүгээр сараас эхлээд Эрүүгийн хуулийн тусгай зүйл анги болох "Бусдыг амиа хорлоход хүргэх" гэсэн зүйл ангиар шалгагдаж байгаа хүмүүс байна. Энэ хэрэгт холбогдон шалгагдаж байгаа хүмүүсийн тайлбар, өргөдөл, гомдол байна. Үүнийг зохиож болохгүй. Хэрвээ Цагдаагийн өгсөн мэдээлэл буруу ташаа байх юм бол Эрүүгийн хариуцлагад татагдана. Тиймээс Цагдаагийн байгууллагаас өгсөн мэдээлэл цаанаа хариуцлагатай байдаг. Алба хаагчид хуулийн хүрээнд л мэдээлэл өгсөн.  

Цагдаагийн байгууллага хойшлуулшгүй ажиллагааг сард 100, 1000-аар нь хийдэг. Дээрх асуудалд баривчлах үйл ажиллагаа явуулаагүй. Прокуророос зөвшөөрөл өгөөгүй. Харин эд хөрөнгө хураах, хэвлэн нийтлэх эрх чөлөөнд халдсан уу үгүй юу гэдгийг шалгах ёстой.  

Өмгөөлөгчдийн хэлж буйгаар процессын алдаа гарсан бол гомдол гаргаад явах бүрэн эрхтэй. Цагдаагийн байгууллагад өргөдөл гомдол ирсэн бол шалгах үүрэгтэй. Хуулийнхаа хүрээнд ажлаа хийж байгааг буруутгаж болохгүй. 

Цагдаагийн газрын байгууллагаас авсан мэдээллээр шалгагдаж байгаа зургаан хүний дансаар нийтдээ 9.3 тэрбум төгрөгийн цахим мөрийтэй тоглоомын гүйлгээ дамжсан байна. Үүнтэй холбоотойгоор 2024 оны есдүгээр сараас эхлэн Эрүүгийн хэргийн заалт буюу бусдыг амиа хорлоход хүргэсэн заалтаар шалгагдаж байгаа. Цаана нь хохирогч байгаа шүү. Энэ мэдээллийг баталгаажуулсны үндсэн дээр олон нийтэд мэдээлэл өгч байна" хэмээв.