Булган аймагт Ардчилсан нам олонхи боллоо

Булган аймгийн улс төр будилаантай байгаа билээ. Өнгөрсөн намрын орон нутгийн сонгуулиар АН 14, МАН 15 суудал авсан ч МАН-ын нэг гишүүн намаасаа татгалзаж хүч тэнцсэн нь улс төрийн нөхцөл байдлыг тааварлах боломжгүй болгосон.

МАН-аас татгалзсан ИТХ-ын гишүүн Л.Одончимэг Булган аймгийн МАН-ын хорооны дарга, Засаг дарга Д.Пүрэв-Очирын хууль зөрчсөн үйлдэл, улс төрийн шийдвэрүүдийг хүлээн зөвшөөрч чадаагүй учир ийнхүү бие даагч болоод байв. Тэгвэл ИТХ-ын гишүүн Л.Одончимэг гуравдугаар сарын 26-ны өдөр Булган аймгийн АН-ын бүлэгтэй хамтран ажиллах хүсэлтэй байгаагаа албан бичгээр мэдэгдэж, АН-ынхан зөвшөөрөөд байна. Тэрбээр албан бичгээрээ "Булган аймгийн хөгжлийн зөв бодлогыг дэмжих, хууль дээдлэх, шударга зарчмыг баримтлах, нийтийн эрх ашгийн төлөө, Монгол Улсын засаг захиргаа нутаг дэвсгэрийн нэгж, түүний удирдлагын тухай хуулийн 35 дугаар зүйлд заасан Иргэдийн Төлөөлөгчдийн хурлын бүрэн эрхэд заасан зарим заалтуудыг хэрэгжүүлэхэд хамтран ажиллахаа илэрхийлж байна" хэмээжээ.

Ийнхүү Булган аймагт АН 14 дээр нэмэх нэг, МАН 14 суудалтай болж хүчний харьцаа эргэлээ. Одоо процесс үргэлжилнэ. Улс төрийн ээдрээ арилж олонхийг бүрдүүлж буй хүчин рүү хүндийн төв эргэнэ. Саяхан огцрох сануулга аваад байсан Засаг дарга Д.Пүрэв-Очир бүрэн огцорч АН засаглах нөхцөл бүрдлээ.